山本五十六

山本五十六

山本五十六（1905年影）

山本五十六（1884年4月4號—1943年4月18號），原名高野五十六，係日本海軍軍人，第26、27任聯合艦隊司令長官，最高軍銜係海軍大將，曾經策劃同指揮珍珠港事件、中途島戰役等等。1943年佢視察前線嘅時候，喺所羅門群島畀美軍打落佢座機。死後追贈海軍元帥大將。

生平

明治時期

1884年（明治17年）4月4號，山本五十六（嗰陣叫做「高野五十六」）喺日本新潟縣長岡市出世，佢係老竇高野貞吉嘅六仔，嗰年高野貞吉56歲，所以佢就叫「五十六」，而佢阿媽生佢嘅時候亦已經45歲。

細個嗰陣嘅山本非常好勝，佢讀小學嗰時聽到有人話「乜嘢都食得就係鉛筆唔食得」，結果竟然真係隊咗支鉛筆落肚。1896年（明治29年）喺新潟縣立長岡中學度讀。1901年（明治34年）山本五十六入讀海軍兵學校，係第32期生，同期嘅有鹽澤幸一、吉田善吾、嶋田繁太郎、堀悌吉等等，佢哋之中同山本關係最好嘅係堀悌吉。1904年（明治37年）11月山本由海軍兵學校畢業，名次喺同期192個學生之中排第11。

1905年（明治38年）1月，山本五十六以少尉候補生嘅身份分配到裝甲巡洋艦「日進」號，5月27日山本參加咗日本海海戰，佢左腿炸傷，左手嘅食指同中指炸斷，後尾到咗1938年（昭和13年），山本因為呢件事獲頒「傷殘軍人第一號徽章」。關於山本係點樣炸傷，官方嘅講法係「敵人嘅炮火」；祗不過亦有海軍出身嘅人，話係因為「日進」號前面嘅炮塔炸膛。至於山本五十六受傷嗰陣著嘅軍服，喺太平洋戰爭爆發之前山本將佢捐咗畀家鄉嘅博物館。

之後山本喺防護巡洋艦「須磨」號、戰艦「鹿島」號、海防艦「見島」號、驅逐艦「陽炎」號分別都服役咗幾個月，加埋有一年半時間。喺呢一年半裡面，除咗喺各艦服役之外，山本五十六重作為海軍砲術學校普通科同海軍水雷學校普通科嘅學生，分別接受過一年零四個月同四個月嘅教育。畢業之後，山本被分配到三等巡洋艦（練習艦）「宗谷」號負責訓練任務，第37期嘅少尉候補生井上成美、草鹿任一、小澤治三郎、鮫島具重等等都接受過佢嘅指導。

1909年（明治42年）山本五十六升做海軍大尉。1911年（明治44年）以海軍大學校乙等學生嘅身份畢業，分配去海軍砲術學校同海軍後勤學校做教官，並同當時嘅同事米內光政成為好朋友。

大正時期

1913年（大正2年），高野五十六嘅父母先後過身。同年嘅12月就讀海軍大學校嘅甲等學生課程。1915年（大正4年），時任行政裁判所（相當於最高行政法院）部長、本身亦係法學博士嘅渡邊廉吉，擔心舊長岡藩嘅名門、作為家臣團之一世代侍奉藩主牧野氏嘅山本家會絕後，所以就打算畀高野五十六以養子嘅身份繼承山本家；而長岡藩第13代家主牧野忠毅，佢嘅細佬牧野忠篤子爵對呢件事亦加以美言，最後決定由五十六繼承山本家。同年9月，海軍省發佈咗高野五十六改姓做「山本」嘅公告。