朏

朏（音翡，粵拼：fei2），又叫朏明，朔後初出嘅月光，初三日見。故此，日本亦叫三日月。

初一朔，全黑唔見光。初二亦好難見到光。初三就月光初現，最早見嘅娥眉月，幼到好似女人堂眉噉。之後夜夜增加，去到初七初八成半圓，就叫弦月，是為上弦月。

胐有另一啲講法，哉生霸，始生魄。哉同始互通，開頭噉解。霸同魄互通，月有白。生霸生魄，即係月白生多啲，相反死霸死魄，月白死減啲。哉生霸、始生魄，就係月開始生白。

原本西洋新月（new moon），係以胐計。後尾天文學，改為朔。回教陰曆保留古法，每月以胐做第一日，舊時有專人去睇。

天文

胐時黃經，日行先而月跟尾，即係日出先，月出後，日落先，月落後，相差個零鐘到兩個幾鐘。日間月光好弱，唔易用眼睇，到日落後月落前，就睇得到。

胐月跟尾，咁日落之後，望向西方，月光亦向下。北半球，月右下見光，南半球就左下。

初一，假定以朔嘅起始為月齡〇日。初三胐，就係月齡二日。再精確啲講，初一朔嘅時間刻，會喺〇到廿四點鐘之間，平均為初一嘅十二點鐘。而胐只可以初三晚，日落後睇到。咁樣，假設初三日胐，十八點鐘，平均月齡二日二五。而平均朔望月，有二十九日五三，咁就行咗百分之八。月相來計，平均去二十七度，即二日一三。不過依啲平均歸平均，因為朔嘅時刻有早有遲，咁胐嘅實際數字，會有前後半日之差。

胐時月相二十七度，計算光嘅面積，按數式(1 - cos 27°) / 2 = 0.056 計，唔足望月百分之六。況且，只係睇到月邊光，日斜照月，光度會更加之低，會低到望月三百分之一。

胐嘅相反，就係月回返朔，會喺廿六晚，廿七未天光之前。月相同胐好似，不過位置東西相反，要望住東方。因為佢日出之前見，咁自然向下，北半球左下見，南半球右下見。

史

最早見於《書經》，召誥有寫「惟丙午朏」。《左傳》：「朏明，月三日明生之名。」《說文》解，「月未盛之明。」

字

朏金文寫左月右出。從月從出，好可能係會意字，朔日之後月出。

朏，月字部，同肉字部嘅胐相近，唔小心會相混。