東柏林
東柏林（德文：Ost-Berlin）係1949年到1990年由東德控制嘅柏林東部地區，亦係東德首都。1961年8月13號－1989年11月9號嗰陣，東西柏林畀柏林圍牆隔開咗。西方盟國唔承認東柏林係東德嘅首都，都冇承認東德管東柏林嘅權利。
| 東柏林 Ost-Berlin | ||
|---|---|---|
 | ||
| ||
| 面積 | ||
| • 陸地 | 409 平方公里（158 平方英里） | |
| 人口 | ||
| • 總計 | 1,279,212（1,989年） | |
.svg)
範圍
[編輯]
呢啲區喺兩德統一之被前屬於東柏林：
史
[編輯]喺1945年二戰結束之後，同盟國喺德國成立咗4個軍事佔領區，各自由同盟國嘅美國、英國、法國、同蘇聯嚟負責管治。而德國嘅首都柏林都俾分咗做美佔區、英佔區、法佔區同埋蘇佔區。原本四個國家都諗住好快一個新嘅德國就會成立。不過因為後尾共產主義國家蘇聯同其他西方資本主義國家嘅關係變差咗，所以西方國家都知道建立一個完整嘅德國係冇可能嘅嘢。最終喺1949年5月23號，德國嘅美佔區、英佔區、法佔區合併成立德意志聯邦共和國，而柏林嘅美佔區、英佔區同埋法佔區都加入咗西德，西柏林成為咗西德嘅外飛地。而蘇聯佔領區，都喺1949年10月7號成立咗德意志民主共和國，東柏林成為咗東德嘅首都。[1]
1949年－1961年
[編輯]
德意志民主共和國成立咗之後，東德政府開始喺東德實行高壓統治，包括打壓東德嘅自由。1950代都因為"按計劃發展社會主義"政策同埋蘇聯要求東德政府畀嘅戰爭賠償，而造成咗東德嘅經濟危機。再加上東德政府喺1953年宣佈將會延長喺工廠度做嘢嘅工人嘅工作時間同埋增加日常用品嘅價錢，而引嚟咗一班東柏林工人嘅不滿。喺1953年5月嘅最後一日同6月初，嗰啲對新工作時間唔滿意嘅工人開始乜都唔做；喺1953年6月16號幾千個東柏林工人喺東柏林史太林大街（而家嘅卡爾-馬克思大街)度抗議政府減佢哋人工。慢慢幾千人嘅示威蔓延到成個東柏林，嗰啲抗議者要求同西德統一、東德領導人辭職同埋民主選舉。最終東德政府喺蘇聯嘅幫助下出動咗蘇聯坦克去東柏林度鎮壓呢場示威[2]。
喺1952年，東德政府封鎖咗東西德邊境，又喺東西德邊境度加咗鐵絲網；不過因為東西柏林嘅邊境仲未封鎖，所以東德人都仲可以透過東西柏林邊境逃去西德。[3]因為每年都有好多個東德人通過柏林邊境去西柏林，然後再取道西柏林去西德。喺1949年-1961年，大約有270萬個東德人永久離開東德（嗰啲人裏面有超過一半嘅都係25歲以下嘅後生仔）。
為咗阻止東德居民逃去西德，東德政府決定喺東西柏林邊境度起個圍牆。1961年8月13號東德政府喺東西柏林嘅邊境度加咗鐵絲網，同埋破壞咗所有同西柏林連接嘅東柏林道路。幾個星期之後，柏林圍牆起好咗，東柏林正式同西柏林隔開[4]。
1961年-1990年
[編輯]1973年，第十屆世界青年同學生聯歡節喺東柏林舉行。呢次聯歡節總共吸引咗嚟自140個國家八百萬個遊客。[5]
教育
[編輯]東柏林總共有3間主要大學包括:
- 含保特大學
- 柏林經濟大學
- 柏林藝術學院
交通
[編輯]喺1961年之前（未起柏林圍牆之前），東西柏林嘅地鐵都仲係互通嘅，即係話西柏林人可以搭地鐵去東柏林，而東柏林人亦都可以搭地鐵去西柏林，而巴士同電車喺柏林分裂嗰陣就唔再營運跨越東西柏林嘅路線。不過柏林圍牆起好咗之後，東柏林人就冇咗遷徙自由（即係話東柏林人唔可以隨便去西柏林），而西柏林人需要申請東德簽證先至可以去東柏林。而柏林公共交通都畀分咗做東西兩部份。
東柏林市內嘅公共交通
[編輯]東柏林地鐵
[編輯]喺柏林圍牆起好咗之後，東德政府閂晒咗所有U6線、U8線同埋U1線喺東柏林境內嘅所有車站。而U2線就被分咗做東西兩個部份，而U5線啲站冚巴爛都喺東柏林。[6]嗰啲被東德政府關閉咗嘅站成為咗幽靈車站，東柏林地鐵公司都喺地鐵路線圖上移除咗所有幽靈車站，而西柏林地鐵公司就喺地鐵路線圖上面張嗰啲幽靈車站標記做唔會停嘅站。
東柏林快鐵
[編輯]喺1961年之後（起咗柏林圍牆之後），柏林快鐵都柏林地鐵一樣都畀分咗做東西兩個部份。而西柏林快鐵喺東柏林境內嘅所有車站（除咗腓特烈大街車站之外）都畀東德政府閂咗。[7]東柏林總共有12條快鐵路線。
東柏林電車
[編輯]
柏林電車喺1929年通車。1953年東西柏林嘅電車系統唔再互通（即係話柏林電車分咗做西柏林電車同東柏林電車兩個系統)。東柏林總共有12條電車線[8]。
東柏林嘅跨市交通
[編輯]東柏林機場
[編輯]柏林紹納費爾德機場係東柏林嘅唯一一個民用機場，喺勃蘭登堡紹納費爾德鎮。根據柏林四強協定，所有德國嘅航空公司都唔可以用柏林機場，不過因為紹納費爾德機場唔喺東柏林，所以東德航空公司係可以用呢個機場嘅。
人口
[編輯]喺1988年，東柏林人口達到巔峰，嗰年東柏林有128萬個居民。而東柏林人口最少嗰年係1961年，都係柏林圍牆起好嗰年，嗰年東柏林淨係得106萬個居民
呢個表嘅人口數據係根據東德人口普查嘅結果或者係東德中央統計局嘅數據。
根據表裏面嘅數據喺1961年之前（柏林圍牆起好之前），東柏林嘅人口係一路都減少緊；喺1961年之後（起咗柏林圍牆之後）東柏林嘅人口係每年都增加緊。
| 統計數據嗰日 | 有幾多個居民 |
|---|---|
| 1946年10月29號 | 1,174,582 |
| 1950年8月31號 | 1,189,074 |
| 1955年12月31號 | 1,139,864 |
| 1960年12月31號 | 1,071,775 |
| 1961年12月31號 | 1,055,283 |
| 1964年12月31號 | 1,070,731 |
| 1971年1月1號 | 1,086,374 |
| 1975年12月31號 | 1,098,174 |
| 1981年12月31號 | 1,162,305 |
| 1985年12月31號 | 1,215,586 |
| 1988年12月31號 | 1,284,535 |
| 1989年12月31號 | 1,279,212 |
政治
[編輯]東柏林嘅市長
[編輯]| 名 | 幾時係市長 | 政黨 |
|---|---|---|
| 弗里德里希·艾伯特 | 1948年11月30號－1967年7月5號 | 德國統一社會黨 |
| 協劈啡斯喱 | 1967年7月5號－1974年2月11號 | 德國統一社會黨 |
| 俄克刮 | 1974年2月11號－1990年2月15號 | 德國統一社會黨 |
東柏林嘅城市指揮官
[編輯]| 城市指揮官 | 軍隊 | 幾時係指揮官 |
|---|---|---|
| Nikolai Erastowitsch Bersarin | 駐德蘇軍 | 1945年5月2號 – 1945年6月16號 |
| 亞歷山大·戈爾巴托夫 | 駐德蘇軍 | 1945年6月17號 – 1945年11月19號 |
| Dmitri Smirnow | 駐德蘇軍 | 1945年11月19號 – 1946年4月1號 |
| Alexander Kotikow | 駐德蘇軍 | 1946年4月1號 – 1950年6月7號 |
| Sergei Dengin | 駐德蘇軍 | 1950年6月7號 – 1953年4月 |
| Pjotr Dibrowa | 駐德蘇軍 | 1953年4月 – 1956年6月23號 |
| Andrei Tschamow | 駐德蘇軍 | 1956年6月28號 – 1958年2月26號 |
| 馬特維·扎哈羅夫 | 駐德蘇軍 | 1958年2月26號 – 1961年5月9號 |
| Andrei J. Solowjow | 駐德蘇軍 | 1961年5月9號 – 1962年8月22號 |
| Helmut Poppe | 國家人民軍 | 1962年8月22號 – 1971年5月31號 |
| Artur Kunath | 國家人民軍 | 1971年6月1號 – 1978年8月31號 |
| 卡爾-海因茨 德魯斯 | 國家人民軍 | 1978年9月1號 – 1989年12月31號 |
| Wolfgang Dombrowski | 國家人民軍 | 1990年1月1號 – 1990年9月30號 |
| Detlef Wendorf | 國家人民軍 | 1990年10月1號 – 1990年10月2號 |
對東柏林嘅稱呼
[編輯]冷戰時期，唔同地區對西柏林同東柏林有唔同嘅叫法。喺西德同西柏林，東柏林嘅官方名稱係„Berlin (Ost)“(翻譯做粵文就係“柏林（東）”)。1960年，西柏林市政府建議所有非官方嘅文件用 „Ost-Berlin“（翻譯做粵文就係東柏林）呢個稱呼，而後尾 „Ost-Berlin“呢個詞畀西德字典嘟釘收納咗。
東德出版嘅官方文件裏面，對柏林蘇聯佔領區嘅叫法係成日變嘅。1957年之前，東德統計年鑑會用“大柏林”、民主區呢兩個詞語嚟稱呼柏林蘇佔區。喺1955年-1957年就用民主柏林區，1957年-1961年嗰陣就用民主柏林。1961年之後，就用首都柏林；東德官方都有用東德首都柏林呢個叫法。喺東德嘅官方公告同地圖裏面，東柏林會畀標記做“柏林”，而西柏林就會畀標記做西柏林。
東西柏林邊境
[編輯]二戰之後，柏林畀分咗做四個國家嘅佔領區，而東柏林就係柏林嘅蘇佔區。
柏林圍牆起好之前
[編輯]柏林公共交通工具跨境
[編輯]1961年柏林圍牆起好之前（除咗柏林封鎖嗰陣），東西柏林嘅居民擁有遷徒自由，即係話嗰時一個東柏林居民係可以隨便咁去西柏林。而嗰陣嘅柏林公共交通系統都仲係完整嘅，而柏林地鐵、電車、巴士同埋快鐵，都繼續營運跨越東西柏林嘅路線。柏林巴士同電車喺1953年東德六一七事件發生咗之後，分咗做兩個唔同嘅系統（即係柏林巴士同電車唔再營運跨越東西柏林嘅路線）。而柏林地鐵同快鐵，喺柏林圍牆起好之前都仲繼續營運緊跨越東西柏林嘅路線。
柏林圍牆起好之後
[編輯]東西柏林邊境檢查站
[編輯]1961年柏林圍牆起好咗之後，東西柏林居民就唔再擁有遷徒自由。如果東西柏林居民要跨越東西柏林邊境嘅話，就淨係可以用9個喺東西柏林邊境嘅檢查站。當中最出名嘅檢查站有查理檢查站，查理檢查站亦係唯一一個允許外國公民用嘅檢查站。[9]而唯一一個完全喺東柏林嘅檢查站係腓特烈大街車站，腓特烈大街車站係一個鐵路檢查站；經呢個檢查站去西柏林嘅乘客會喺呢個車站完成東德出境手續，乘客過咗東德海關之後，就可以去西柏林地鐵U6線嘅月台度搭地鐵去西柏林市區，或者去西柏林快鐵月台度搭快鐵去西柏林。[10]
東柏林嘅建築
[編輯]東柏林嘅地標
[編輯]
建築特色
[編輯]因為東柏林係社會主義國家東德嘅一部份，所以東柏林有好多具有蘇聯建築風格嘅建築物。[11]
兩德統一之後
[編輯]1990年10月3號兩德統一咗之後，東柏林同西柏林合併返做一個城市，而柏林都重新成為咗德國嘅首都。統一咗之後德國政府對前東柏林地區進行咗重建，而部份東德政府嘅建築畀德國政府拆咗例如共和國宮。依家東西柏林經已大致上融合咗，不過前西柏林地區同前東柏林地區都仲有啲差別，例如而家仲可以喺前東柏林地區度搵到具有社會主義特色嘅建築。前西柏林地區嘅街燈係白色，而前東柏林地區嘅街燈就係橙色。
前西柏林地區同前東柏林地區經濟嘅差距都經已越嚟越少，不過而家呢兩個地區喺經濟上都仲有啲差別，例如前世柏林地區係依家柏林嘅商業區，而前東柏林地區就係個有藝術特色嘅地方。[12]
名人
[編輯]菲力斯茄喇馬（德國男演員；1973年3月23號喺東柏林出世)
睇埋
[編輯]- ↑ "Allied Occupation of Germany， 1945－1952". US Department of State. January 20,2021.
{{cite web}}: Check date values in:|date=(help)CS1 maint: url-status (link) - ↑ "GDR Rebellion: The 1953 uprising – DW – 06/12/2023". dw.com (英文). 喺2024-05-23搵到.
- ↑ "What was the Berlin Wall and how did it fall?". Imperial War Museums (英文). 喺2024-05-11搵到.
- ↑ "The construction of the Berlin Wall". www.berlin.de (英文). 2021-07-16. 喺2024-05-24搵到.
- ↑ "Comac - Festival Of Youth & Students: history". web.archive.org. 2011-05-14. 歸檔時間2011-05-14. 喺2024-10-24搵到.
{{cite web}}: CS1 maint: bot: original URL status unknown (link) - ↑ "From A(lexanderplatz) to Z(ossen): Public Transit in East Berlin". The GDR Objectified (英文). 2016-03-21. 喺2024-05-21搵到.
- ↑ "History of S-Bahn Berlin". sbahn.berlin (英文). 喺2024-05-22搵到.
- ↑ "Do you see a tram? You're in East Berlin". blog.datawrapper.de (美國英文). 喺2024-05-24搵到.
- ↑ Tours, Original Berlin (2024-03-07). "The Legendary Checkpoint Charlie: A Closer Look into Berlin's Iconic Symbol of the Cold War". Original Berlin Tours (美國英文). 喺2024-10-11搵到.
- ↑ Jennings, Ken (2012-05-21). "Friedrichstrasse Station: The Cold War's Strangest Border". Condé Nast Traveler (美國英文). 喺2024-10-11搵到.
- ↑ "Berlin's Architecture is Mixture of Old and New". mansion-global-app.s3.amazonaws.com. 喺2024-05-25搵到.
{{cite web}}: CS1 maint: url-status (link) - ↑ "Top 11 East Berlin And West Berlin Differences - Dream Plan Experience" (加拿大英文). 2023-09-25. 喺2024-05-23搵到.