舞龍

  提示：呢篇文講嘅唔係武隆。

舞龍係起源於中國嘅傳統舞蹈。舞龍同舞獅，古時係嚮一年中嘅大型節慶裏面節目之一。隨住華人移民到世界各地，而家舞龍呢個文化，已經遍及中國、台灣、香港、東南亞，以及歐美、澳紐各個華人集中嘅地區，成為中華文化嘅一個標誌。

意義

龍，係中國嘅圖騰，龍代表咗中華民族，代表咗神州大地。龍係中國皇帝嘅象徵。

作為一個中華民族引以為傲嘅標誌，龍圖騰嘅存在產生咗舞龍嘅文化。龍本身作為一個神秘而又傳奇嘅動物，可以嚮天上飛、水中游。傳說中就有海龍王掌管雷雨。中國人就依照佢哋嘅想像力，創造出舞龍嘅各種動作。

嚮中國文化而言，舞龍帶有吉祥、興旺、太平、繁榮嘅意思。中國係農業國家，農民往往由於龍同天氣嘅關係，以拜祭、舞龍祈求有利耕種嘅天氣。

傳統

點睛

舞龍嘅傳統包括一個點睛嘅儀式。古代嘅點睛係尊請皇帝嚟，以紅沙點龍睛，意謂賦予光明，賦予力量。係民間，則由識武術者，嚮表演一套武功之後點睛。點睛者，武術一個比一個高超，故而點出之睛亦愈見渾圓。所以古代點睛之處，往往係武林高手會集之處。

現代嘅點睛儀式已經從古時演化，變由當地政府或組織最高代表出任呢個榮譽。

音樂

鼓、鈸、鑼都係舞龍嘅配樂樂器，提供音樂效果同埋節奏，並且有指揮作用。

鼓樂嘅風格，亦因地區、社會階層（民間、朝庭）之分亦有別。

其他

傳統上，舞過一次嘅龍稱為老龍。農村嘅地方，都會將老龍保存，翌年又攞出另一條新龍黎舞。積聚落嚟龍身會被聯起，成為一條成百人嘅長龍。

舞龍嘅同時，龍身旁邊會有魚同舞。

風格

南龍

南龍，故名思議，係江南一帶發展出嚟嘅舞龍形式。

南龍嘅龍身比較重，龍頭係成條龍最重嘅部份。南龍嘅風格係有氣勢。因為佢嘅重量，所以動作上嚟講，唔似北龍咁注重花巧，而係注重體力。

引南龍嘅係一顆龍珠一個人，而加上龍身，通常就有十個人左右，龍身大約長九米。由於南龍唔要求靈活，所以，龍身可以係二十米、百米，甚至有千米長龍。龍頭大細，亦因應龍身長短而改變。

嚮製作上，南龍比較傳統，龍頭都係用竹紙紮。傳統嘅龍身花紋係同布縫上去，而比賽龍嘅龍身花紋，為求輕巧，都係嚮布上畫出嚟嘅。而家大部份都係畫上去，甚至係電腦配合縫出嚟。

南龍嘅動作，通常有盤圈、S彎、龍頭越過龍身等等。

北龍

北龍係江北一帶發展出嚟嘅風格。

以龍身嚟講，北龍龍頭比較細同輕巧，用料可以係傳統嘅紙紮，或者比較新穎嘅用輕身嘅膠質，以便作出多花款嘅動作，譬如：左右翻騰等等。有別於南龍，北龍嘅動作範圍細好多，故而所要求嘅體力亦相對降低。

北龍嘅動作，通常都適宜嚮漆黑環境中進行。亦因為咁樣，製作北龍嘅物料都係會螢光。

目前，北龍喺世界上比較流行。喺中國、香港、馬來西亞、星加坡等地方，都經常舉辦舞龍嘅龍藝賽事同表演。

發展

• 美國拉斯維加斯馬戲團Cirque du Soleil嘅演出Dralion，就有龍獅作為主角，係西方人對東方文化傳譯嘅一個例子。

• 喺美國、加拿大、英國、澳洲等地嘅中國城，舞龍已經成為例行節目之一。