質量數
物理學同化學嘅質量數係指某一種核素裡面質子同中子嘅總數。質量數係無量綱量，而且始終係整數。
其它類似概念
[編輯]- 質量數：根據定義，碳-12爾種核素嘅質量數係12，氫-1爾種核素嘅質量數係1，而「碳元素嘅質量數」爾種講法無意義；
- 摩爾質量：根據摩爾嘅定義，碳-12爾種核素嘅摩爾質量準確值係0.012 kg/mol，氫-1爾種核素嘅摩爾質量會接近 0.001 kg/mol，但唔相等（詳見下文，實際上大概係 0.001007825 kg/mol）。根據碳、氫元素各種同位素嘅自然豐度，天然存在嘅碳單質道，碳原子嘅摩爾質量大概係 0.01201 kg/mol，天然存在嘅氫氣道，氫原子嘅摩爾質量大概係 0.0010079 kg/mol，氫分子嘅摩爾質量大概係 0.0020159 kg/mol；
- 相對（原子/分子）質量：碳-12爾種核素嘅相對原子質量準確值係 12，氫-1爾種核素嘅相對原子質量大概係 1.007825。天然存在嘅碳單質嘅相對原子質量大概係 12.01，天然存在嘅氫氣嘅嘅相對原子質量大概係 1.0079，相對分子質量大概係 2.0159；
- 式量：式量係針對化學式而言，「C」爾個化學式嘅式量大概係 12.01，「H2」爾個化學式嘅式量大概係 2.0159。
質量數同（核素嘅）相對原子質量之間嘅區別同聯繫
[編輯]根據定義，一種核素嘅質量數始終會係整數，但係相對原子質量雖然數值上好接近質量數，但往往唔係整數（碳-12除外，根據摩爾嘅定義碳-12嘅相對原子質量係整數），噉係因為：
- 質子同中子嘅質量唔相等，而且電子亦有質量。計算質量數嘅時候，質子同中子都係計成1，但係其實佢哋之間嘅質量唔相等。另一方面，計質量數嘅時候係無計電子。正因為噉，即使唔考慮質量虧損（en:Nuclear_binding_energy#Mass_defect），一個碳-14原子（含有6個質子、6個電子同8個中子）嘅質量同一個碳-12原子（含有6個質子、6個電子同6個中子）嘅質量之比唔會係 14:12，於是碳-14爾種核素嘅相對原子質量亦唔會啱好等於整數 14。
- 形成原子核嘅時候有質量虧損。如果衹係受到第一個因素影響，氫-2原子（含有1個質子、1個電子同1個中子）嘅質量會係碳-12原子（含有6個質子、6個電子同6個中子）嘅六分之一。但實際情況唔係噉。因為形成原子核嘅過程中會發生質量虧損，即係一部分質量會轉變成能量釋放出來，所以碳-12原子核嘅質量係會略小於（而唔係等於）6個質子同6個中子嘅質量總和。由於形成唔同嘅原子核，質量虧損都唔同，所以氫-2原子嘅質量並唔會啱好等於碳-12原子質量嘅六分之一。
參考
[編輯]- 北京師範大學、華中師範大學、南京師範大學無機化學教研室編 (2002)。"1". 《无机化学（上）（第 4 版）》。高等教育出版社。ISBN 9787040107685。