青銅

青銅鼎

青銅（粵拼：cing1 tung4）係一種加咗12-12.5%錫（化學符號係Sn）既銅（化學符號係Cu)合金。古人由用石器轉成用青銅器，係文明徵兆。

青銅喺氧化之前嘅顏色謂之古銅色，唔帶青色，佢之所以叫做青銅，係因為會慢慢噉俾氧氣及水等腐蝕，喺表面形成藍綠色嘅化合物——叫做銅綠，而其顏色名為青銅色；呢個名亦將佢同偏紅色既紅銅（又叫做純銅或者紫銅）等區分。

青銅原本係指銅錫合金，不過依家工業用既銅，除咗黃銅（銅鋅合金）、白銅（銅鎳合金）之外，其他既銅合金都叫做青銅。

為咗控制青銅既硬度、強度、延展性或者係可加工性，製造青銅既時候，通常會加啲鉛，同埋其他金屬（例如鋁、錳、鎳或鋅之類）、非金屬（例如磷），甚至或類金屬（例如砷或矽）。

工業用既青銅種類：

錫青銅：主要係用嚟做蝸輪、齒輪、啤令之類。

鉛青銅：主要係用嚟做啤令，尤其係引擎用嗰啲。

鋁青銅：主要係用嚟做船用零件（例如螺旋槳），原因係鋁青銅比較抗腐蝕同埋耐磨。

磷青銅：主要係用嚟做彈弓、電池接觸片同埋插蘇裏面既銅製零件，原因係磷青銅導電性能同埋彈性都好好。