Rakshasa

’n Rakshasa (Sanskrit: राक्षस rākṣasa) is ’n mitologiese wese in die Hindoemitologie. Omdat hierdie mitologie ander godsdienste beïnvloed het, is die rakshasas later in Boeddhisme opgeneem. Hulle word ook "mensvreters" (nri-chakshas of kravyads) genoem. ’n Vroulike rakshasa is ’n rakshasi. ’n Rakshasi in menslike vorm is ’n manushya-rakshasi. Die terme "asura" en "rakshasa" word soms afwisselend gebruik.

Oorsprong

Daar word geglo rakshasas is geskep uit die asem van Brahma toe hy aan die einde van die Satya Yuga (’n tydperk in Hindoeïsme) geslaap het. Hulle was so bloeddorstig toe hulle gebore is dat hulle Brahma self begin eet het. Brahma het geskree: "Rakshama!" (Sanskrit vir "Beskerm my!", vandaar die naam). Vishnu het tot sy hulp gekom en alle rakshasas na die aarde verban.

Hulle word gewoonlik uitgebeeld as lelike, woeste en groot kreature met twee slagtande wat uit hul bokaak steek en skerp, klouagtige vingernaels. Hulle is gemeen, grom soos wildediere en is onversadigbare kannibale wat menslike vlees kan ruik.

Soms het hulle vlammende rooi oë en hare, en drink hulle bloed uit hul hande of ’n menslike skedel. Hulle kan gewoonlik vlieg en verdwyn, en het maya (towerkragte van illusie) wat hulle in staat stel om willekeurig van grootte en vorm te verander.

Eksterne skakels

Wikimedia Commons het meer media in die kategorie Rakshasa.
Hierdie artikel is vertaal uit die Engelse Wikipedia