Richard Stuttaford

Richard Stuttaford
Minister van Handel en Nywerheid
Ampstermyn 1939 – 1941
Eerste minister	Jan Christian Smuts
Voorafgegaan deur	Oswald Pirow
Opgevolg deur	Sidney Frank Waterson
Minister van Binnelandse Sake en Gesondheid
Ampstermyn 1936 – 1939
Eerste minister	Barry Hertzog
Voorafgegaan deur	Jannie Hofmeyr
Opgevolg deur	Harry Gordon Lawrence
Persoonlike besonderhede
Gebore	13 Junie 1870 Kaapstad, Kaapkolonie
Sterf	19 Oktober 1945 (op 75) Stellenbosch, Unie van Suid-Afrika
Politieke party	Verenigde Party

Richard Stuttaford (Kaapstad, 13 Junie 1870 - Stellenbosch, 19 Oktober 1945) was 'n Suid-Afrikaanse handelaar, kabinetsminister en die seun van Samson Rickard Stuttaford, 'n grondlegger van die afdelingswinkel Stuttafords.

Stuttaford ontvang sy opleiding in Engeland en Frankryk en sluit hom in 1892 aan by die handelsfirma, Thorne, Stuttaford & Co, wat sy pa help oprig het saam met sir William Thorne. Hy word die hoof van die maatskappy in 1917. Buiten as lid van die Kaapse stadsraad, van die Kaapstadse Kamer van Koophandel, waarvan hy voorsitter was van 1918 tot 1920, en voorsitter van die Vereniging van Kamers van Koophandel van Suid-Afrika (1921 tot 1923), het hy aanvanklik nie in die openbare lewe belang gestel nie, maar in 1924, toe hy 54 jaar oud was, word hy tot die Unie-Volksraad verkies as die lid vir Nuweland teen die Konstitusionele Demokraat, C.A. Lagesen met 'n meerderheid van 702 stemme. In 1929 is hy onbestrede verkies vir dieselfde kiesafdeling en in 1933 weer onbestrede, dié keer as S.A.P.-Koalisie-kandidaat vir Claremont, nadat Nuweland tydens 'n herafbakening afgeskaf is. In 1938 wen hy as kandidaat van die Verenigde Party ook in Claremont met 'n meerderheid van 2 052 teen E.M.O. Clough van die Dominiumparty, wat toevallig dieselfde getal stemme op hom verenig het as Stuttaford se meerderheid.

In die Unie-Volksraad was sy kennis van die handel van groot waarde en genl. Jan Smuts nooi hom om deel te neem aan die onderhandelings met Britse kommersiële owerhede in Ottawa. Hy was minister sonder portefeulje van 1933 tot 1936. Van 1936 tot 1939 was hy minister van volkswelsyn en van 1939 tot 1942 van handel en nywerhede in genl. Smuts se oorlogskabinet.

Op 'n heel ander gebied het hy ook naam gemaak as die eerste grondlegger van 'n tuindorp in Suid-Afrika toe hy in omstreeks 1920 verantwoordelik is vir die stigting van Pinelands naby Kaapstad danksy 'n baie ruim skenking. Hy is in 1945 op Stellenbosch oorlede.

Bronne

• Potgieter, D.J. (red.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• Rosenthal, Eric. 1978. Encyclopaedia of Southern Africa. Cape Town and Johannesburg: Juta and Company Limited.