Mentesche

Mentesche (türkisch Menteşe Beyliği) isch e türkischs Beylik gsi, wo in dr zwäite Helfti vom 14. Joorhundert im Weste vom Riich vo de Seldschuke vo Konya, wo das noch dr Niiderlaag gege d Mongole (1243) zerfalle isch, entstande isch. Si Hauptstadt isch Milas gsi.

Dr Gründer vom Beylik, dr Mentesche Bey, isch vorhär in de Dienst vo de Germiyan gstande und Mitgliid vom Oghusestamm Afşar gsi. D Bey vo Mentesche häi iiri Macht vo dr Küste uf s Hinderland vo Karie und öbbe 1285 in s Gebiet vo Milet usdeent. Iire Heerschaftsberiich het äbbe dr hütige Browinz Muğla entsproche. Si häi ängi Handelsbezieige mit dr Republik Venedig und mit Kreta ghaa; z Milet het e venezianische Konsul residiert. D Stedt Beçin, Milas, Balat, Finike, Elmali, Kaş, Mağrı (hüte Fethiye), Muğla, Çameli, Acıpayam, Tavas, Bozdoğan, Çine, Tralleis (hüte Aydın) und d Insle Rhodos si für churzi Zit under dr Heerschaft vo de Mentesche gstande.

In dr zwäite Helfti vom 14. Joorhundert isch dr Druck vo de Osmane vo Norde häär gröösser worde, 1390 häi si s Beylik vo de Mentesche zum erste Mol annektiert. Noch dr Niiderlaag vo de Osmane in dr Schlacht bi Ankara 1402 gegen e Tamerlan, si d Beyliks wie d Mentesche und d Karaman, wo vo de Osmane erooberet worde si, wider unabhängig worde. Doch 1421 isch s Beylik ändgültig under die osmanischi Heerschaft choo.

Litratuur

P. Wittek, Das Fürstentum Mentesche. Studie zur Geschichte Westkleinasiens im 13.-15. Jahrhundert. Istanbul 1934
E. A. Zachariadou, Menteše Oġularï. Lexikon des Mittelalters, Band 6, 530-531, ISBN 3-423-59057-2 (Studienausgabe 2003)
E. Merçil, Menteshe-Oghulları. Encyclopedia of Islam 6 (1991), 1081-1019, ISBN 90-04-08112-7

Dä Artikel basiert uff ere fräie Übersetzig vum Artikel „Mentesche“ vu de dütsche Wikipedia. E Liste vu de Autore un Versione isch do z finde.