Vall de Lierp

Esta pachina ye escrita en ribagorzano.

Vall de Lierp Valle de Lierp
Municipio d'Aragón
Paisache de la vall de Lierp dende Sarrat.
Entidat  • País  • Provincia  • Comarca	Municipio  Aragón  Uesca Ribagorza
Capital	Eixea
Partiu chudicial	Boltanya
Superficie	32,41 km²
Población  • Total  • Densidat	60 hab. (2013) 1,85 hab/km²
Altaria  • Meyana	1.012 m.
Distancia  • 122 km	enta Uesca
Alcalde	José María Ariño Castel
Codigo postal	22451
Parroquial  • Diocesi  • Arcipestrau	Balbastro-Monzón Sobrarbe-Ribagorza
Coordenadas	42°22’46’’N 0°28’35’’E
Vall de Lierp Vall de Lierp en Aragón
Web oficial

Vall de Lierp (oficialment Valle de Lierp en castellano, La Vall de Lierp en catalán) é un municipio aragonés de la provincia de Uesca, a la comarca de Ribagorza. Los suyos habitants en dicen simplament la Vall.

La suya población é de 60 habitants a una superficie de 32,41 km² y una densidat de población d'1,85 hab/km². Llingüisticament, el municipio se troba en pllena zona de transición entre l'aragonés y el catalán ribagorzanos.

Cheografía

Vall de Lierp é el municipio, que prene nome de la vall natural a on é situau; una vall menor que desepara las falderas meridionals de la montanya d'el Turbón y la serra d'el Chordal. El municipio é feito de llugars chiquinins (aldeyas) y mases, sin garra llugar granizo, con lo que é un habitat disperso. La casa de la Vila é en Eixea, manimenos, que por mida y por proximidat enta la carretera fa una miqueta ixa función.

Eixea, seu d'el concello, é a 1.012 metros d'altaria sobre el nivel de la mar, a una distancia de 122 km de la ciudat de Uesca, la capital de la suya provincia.

El municipio limita pe'l norte y nord-este con Torlarribera, pe'l canto de las Vilas. La vall de la Ribera é una vall chirmana con la vall de Lierp, tanto en orientación (baixan dende el Turbón cara ta l'Isabana) como llingüisticament, pos las dos presentan una gradación entre l'aragonés y el catalán en las suyas variedaz ribagorzanas.

Per l'este, tot seguind el curso d'el barranco cara ta el río Isabana, llimita con el municipio de Beranui, con llugars como Calvera, Vallabriga y el monesterio d'Obarra. Pe'l sud, el termino municipal llimita con la serra d'el Chordal y con la parte oriental d'el municipio de la Foradada d'el Toscar per la vall d'el barranco de Vacamorta, que é de l'atro costau de la serra. Por l'ueste, el municipio fa la muga con vall de Bardaixí, vall y municipio homonimos que rematan en l'Esera cerqueta de Campo.

La vall de Lierp é una vall de dos concas hidrograficas. Las aiguas de llevant se'n van llibrement cara ta l'Isabana y els llugars que n'i ha en ixe canto (Piniello y Reperós) son despoblaus en l'actualidat, que a mes a mes son mes cerca de la cabecera municipal de Torlarribera que d'Eixea. Por el canto occidental, a la inversa, las aiguas marchan ta l'Esera a traviés d'el congustro d'Eixea u «forau d'Eixea», pasand ta la vall de Bardaixí como afluents d'el barranco d'Esplluga. Son las aldeyas de la parte occidental Padarnín, l'Obago, Pueyo y Sarrat, a mes d'Eixea, que fa de cabecera municipal. Manimenos, la divisoria d'aiguas é suave y no suposa una muga real entre els diferents nuclios d'el municipio.

Los llugars

Casas en Eixea.

Vall de Lierp é un habitat disperso de diferents llugars u aldeyas, de molt poquetas casas cada un. En tenim con varias, de casas, como Eixea, que fa las veces de capital municipal per estar el mas gran y tamé el que ye mas cerca de la carretera que va de Beranui ta Campo. Atros no son mes que casas dispersas en barrios, como Sarrat u como l'Obago, a la baixant d'el Chordal, y Padarnín y Piniello a la d'el mont Turbón. Pueyo é una aldeyeta de dos casas a'l costau de Sarrat, a la falda solana d'el Turbón. Y Reperós é mes leixos de toz los atros, despobllau, ya a'l cabo baixo de la vall, mes cerca de Beranui y a'l cantet de Torlarribera.

La llengua

La vall de Lierp, y por ixo mesmo el municipio homonimo que aplega las distintas entidaz de población que se i troba, é una vall natural y chiquirrina que s'ubre enta l'Isabana, a la conca d'el cual el parlar é caracterizau como catalán de transición enta aragonés. Manimenos, la realidat llingüistica de la vall de Lierp arresulta encara mes complexa que la de la vall a la cual afluyen las suyas aiguas, con que é un de los curiosos casos (como tamé pasa con la suya vecina vall de la Ribera) anon la transición entre los dos idiomas se fa gradualment entre los nuclios d'un mesmo municipio.

La vall de Lierp tene, per la suya cabecera, contacto inmediato con la ya aragonesoparlant vall de Bardaixí y la terra de Campo (a on se parla inequivocament aragonés ribagorzano), lo cual dota a la parla local d'una naturaleza transicional mes marcada que a la vall de l'Isabana, arriband ta'l punto que se puede considerar aragonés de transición ta catalán el parlar de las aldeyas situadas mes cerca d'el cabo alto de la vall, proxima con el limite con Bardaixí, y catalán de transición enta aragonés lo charrau a los nuclios mes baixos, cercans con Beranui y l'Isabana, que son despoblaus en l'actualidat. Tot ixo, mesmo sin que calga sallir d'el termino municipal. Esto é tot lo mesmo que pasa a la vecina vall de la Ribera (Torlarribera, Visalibons, las Vilas, etc.).

Publicacions

José María Ariño Castel publicó La Bal de Lierp. Geografía y léxico. (Consello d'a Fabla Aragonesa, Uesca, 1999). L'autor (Vall de Lierp, 1946) esplanica en primera parti bels datos de cheografía humana, fisica y economica sobre la vall de Lierp y cada uno d'els suyos llugars. La segunda parte ye una replega de 988 vocables de la vall, toz con bella frase d'eixemplo ta que se i veiga el contesto. Ye una contrebución de gran intrés que viene a emplir la falta d'información que tenebanos sobre ista redolada, una de las mes orientals en las que se charra aragonés, un aragonés ribagorzano ya de transición enta el catalán.

Caracteristicas

El Turbón visto dende Eixea. Esta montanya tan sinyalera é vistable dende tot el municipio.

• Demostrativos aragoneses: este, ixe, aquel.
• Posesivos aragoneses: el suyo, la mía, los suyos... y no pas los catalans el seu, la meva/meua, els/los seus.
• Plurals femenins que rematan en -as: la vaca → las vacas.
• Presenta el fonema fricativo dental xordo (θ) pa totas las z y las c debant de e y de i: cebolla /θe'boʎa/, cenizo /θe'niθo/, tocín /to'θin/, zarpa /'θarpa/, zurrupar /θuru'pa/; como é regular en aragonés y en castellano, y no se sonoriza ta /s/ como é normal en catalán (con excepcions contadas) y en benasqués.
• Pronuncian las -t que se troba a final de parola: Sarrat /sa'rat/, tot /'tot/, y especialment a la fin de los dimunitivos masculins: chiquet /tʃi'ket/, corderet /corde'ɾet/, etc. como pasa de regular en aragonés ribagorzano pero no en atros dialectos aragoneses. Manimenos, la -T a la fin de substantivos femenins que en llevan no la guardan, como é normal tamé en ribagorzano y en tot l'aragonés: ciudat /θiw'da/, salut /sa'lu/, comunidat /komuni'da/, velocidat /beloθi'da/, etc. Los pllurals son con fonema fricativo dental xordo (θ): corderez /korde'ɾeθ/, y se vei tamé en toponimia basada en nomes pllurals como Las Corz /laskorθ/, els Sarraz /elsa'raθ/, etc. que n'i ha en el termino.

Rechistro

Entre que se feba el prochecto de l'Archivo Audiovisual de l'Aragonés, que se va fer dende l'anyo 2001 y enta debant, con la finalidat de documentar d'una traza grafica los parlars vivos de los diferents llugars aragonesofonos de l'Alto Aragón, se va grabar en video colacions y explicacions sobre la vida tradicional per parte de parladors patrimonials de la parla local d'Eixea y de Padarnín, que son aldeyas de la vall de Lierp. Las ditas grabacions son disponibles a la plataforma YouTube.

Puestos d'interés

• En Sarrat i ha un museu etnolochico de titularidat municipal, que exposa bels 170 obchectos en una superficie de 100 metros cuadraus, adentro de lo que enantes eba l'abadía d'el llugar. Los obchectos exposaus dimanan toz de las casas d'el municipio.

Demografía

Evolución demografica

1362 f 1495 f 1842 1857 1860 1877 1887 1897 1900 - - 327 277 300 312 284 224 212

1910 1920 1930 1940 1950 1960 1970 1981 1991 231 263 203 208 197 173 99 73 61

1992 1994 1996 1997 1998 1999 2000 2001 2002 - - - - 60 59 59 55 54

2003 2004 2005 2006 2007 2008 2009 2010 2011 51 49 49 47 47 44 52 65 66

2012 2013 2014 2015 2016 2017 2018 2019 2020 64 59 58 54 52 48 46 - 51

2021 2022 2023 2024 2025 2026 2027 2028 - 46 53 - - - - - - -

1717-1981: población de feito; 1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración

Reparto de concellers

Eleccions municipals
Partiu	1979	1983	1987	1991	1995	1999	2003	2007	2011	2015	2019
Partido de los Socialistas de Aragón	-	5	1	1	1	1	1	1	2	2	2
Partido Aragonés	-	-	-	0	0	-	0	0	1	1	1
Unión de Centro Democrático	5	-	-	-	-	-	-	-	-	-	-
Total	5	5	1	1	1	1	1	1	3	3	3

Alcaldes

Lista d'alcaldes

Lechislatura	Nombre	Partiu politico
1979–1983
1983–1987
1987–1991
1991–1995
1995–1999
1999–2003
2003–2007
2007–2011
2011–2015	José María Ariño Castel	Partido de los Socialistas de Aragón
2015–2019
2019–2023
2023–2027	Jose Angel Rami Nerin	PSOE

Festas

Toz els llugars de la Vall fan las festas de conchunta. Este é el calendario festivo de la vall de Lierp:

• La festa menor é pa Santa Agueda, el 5 de febrero.
• 13 de chunio, romería enta la ermita de Sant Antón.
• 29 de chunio, romería enta la ermita de Sant Pedro en Padarnín.
• 2 de chuliol, romería enta la ermita de la Virchen d'el Pueyo, entre Eixea y l'Obago.
• La festa mayor tradicionalment eba el 4 y 5 de setiembre. Actualment las festas con Semana Cultural se fan la semana antes de la zaguera d'agosto.

Se veiga tamién

• Lista de municipios de Uesca

Vinclos externos

• Se veigan as imáchens de Commons sobre Vall de Lierp.
• (es) ValleLierp.es, web d'el Concello de Valle de Lierp.
• (es) Vall de Lierp en el portal de turismo de Ribagorza.
• (an) Pesca y Guiso de Lliebre, videos de l'Archivo Audiovisual de l'Aragonés sobre la parla autoctona en Eixea (Valle de Lierp).
• (an) Noms dels llugás, Receta del membrillo y Romería de San Pedro, videos de l'Archivo Audiovisual de l'Aragonés sobre la parla autoctona en Padarnín (Valle de Lierp).

• Datos: Q984621
• Multimedia: Valle de Lierp / Q984621