Varluožis
Varluožis (kėtap boužgalvis, varluožgalvis, varluogalvis, varluozos, varluožė) ī tėktās ėš korkolū ėšsirėtė̄s tuokis gīvis, būsėma varlie. Ons da ī kap ė žovės – toria ėlga oudega ė trompa bet stuora kap boužalė, kap božons galva. Ėš šuonu toria kap ė pelekus, kap ė kuojės.
Varluožē da toria žiaunas, ėr alsou tėktās ondenio (ondenie ėštėrposio uoro), jied vairės žuolės, gal prīlėptė prī augalū.
Paskom varluožē spierē parsimaina i varlės – anėm nūkrėnt oudega, ėšaug kuojės, padėdliej ciels kūns, anėi praded alsoutė uoro, gīventė ont kronta.
Varluožē laikas tūs vėitūs, katrūs varlie sokorkė korkolus, tas ī balūs, kūdrūs, griuoviūs, pelkies, ežerū ėr opaliu žuolies, šolnies.
