Abdülasis

Tekst üüb Fering

Abdülasis (üüb Osmaans Türkisk: عبد العزيز ‘Abdü'l-’Azīz, üüb Türkisk: Abdülaziz; * 8. Febrewoore 1830 uun Konstantinoopel; † 4. Jüüne 1876 uk diar) faan 25. Jüüne 1861 tu 30. Mei 1876 wiar de 32. sultaan faan det Osmaans Rik.

Hi wurd sultaan efter a duas faan sin bruler Abdülmedschid I.. Twesken 1861 an 1871 dön Tansimat-refoormen, wat uun't regiaringstidj faan san bruler begand, wurd oner't feering faan sin ministern Mehmed Fuad Pascha an Mehmed Emin Âli Pascha widjerfeerd. Hi wiar de iarst osmaans sultaan, diar tu waasteuroopa raiset an en somren 1867 en rä faan wichtig europeeisk hoodsteeden beschükt, diaroner Pariis, London an Wien. Efter a duas faan Mehmed Fuad an Mehmed Emin Âli wurd 1871 Mahmud Nedim Pascha a gratwesiir. A sultaan wul, uunsteed för sin nefe Murad (wat efter det ual truunfuligordning san arew wiar), dat san dring Jusuf Issedin san arew wurd. Mä Rüslun leet hi ham uun ferhanlingen auer en putsch mä rüs halep iin, am det ual truunfuligordning amtustörten. 1875 wurd a stoot bankerot auer a kosten faan’t modernisiaring faan’t armee, det luksuriöös leewenstil faan a sultaan an sin bauföörhaan, diaroner at renowatschoon faan de Çırağan-Palast.1875 kaam det uk tu staheun uun Bosnien an Hertsegowina, 1876 fuligt det bulgaars Aprilstaheu. Det wurd liawet, dat Rüslun dön tau staheun holep. Uun Konstantinoopel kaam det 11. Mei 1876 tu't staheu jin Mahmud Nedim. A sultaan entleet det, man wurd hi uun a naacht faan 29. tu 30. Mei 1876 faan Hüsein Awni Pascha an Midhat Pascha tu uftoonking twüngen. 4. Jüüne wurd Abdülasis üüb jo order uun de Çırağan-Palast ambroocht.

Luke uk diar

Sultaanen faan det Osmaans Rik uun dön njüügentanjst an twuntigst juarhunerten: Selim III. (1789–1807), Mustafa IV. (1807–1808), Mahmud II. (1808–1839), Abdülmedschid I. (1839–1861), Abdülasis (1861–1876), Murad V. (1876), Abdülhamid II. (1876–1909), Mehmed V. (1909–1918), Mehmed VI. (1918–1922).

Föörgunger	Amt	Efterfulger
Abdülmedschid I.	Sultaan faan det Osmaans Rik 1861-1876	Murad V.