Bataie di Cannas

La bataie di Cannas e je stade la bataie plui grande de seconde vuere puniche, combatude tra Romans e Cartagjinês. E je stade ai 2 di Avost dal 216 p. di C. cu la partecipazion di plui o mancul 80.000 Romans, ripartîts in 8 legjon, 4 legjons di soldâts romans e altris 4 di soldâts aleâts. Il lûc de bataie al è contindût: la plui part dai storics lu identifichin cun Canne inte campagne de citât di Barletta di cumò, in Pulie, dongje dal flum Ofanto, ma a son ancje altris ipotesis. La bataie e rapresente un dai miôr esemplis di cerclament tatic complet de storie militâr. In cheste bataie, vinçude dai Cartagjinês comandâts di Anibal, a son muarts une vore di Romans (50.000 par Tît Livi, fintremai 70.000 par Polibi), tra chei il stes consul Luci Emili Pauli. La plui part di chei che a son sorevivûts, cuasi ducj ferîts, a son stâts fats presonîrs; dome pôcs, restâts di vuardie al cjamp, a son scjampâts inte citât di Canosa. Anibal al à pierdût dome 8.000 oms,pe plui part Gjai. Anibal al à metût tal centri de formazion i contingjents dai aleâts gjai e iberics, disponintju in forme di arc cul centri sburtât indenant. Il fin di cheste disposizion particolâr al jere dopli: in chest mût si faseve mancul fisse la masse di impat dai Gjai, favorint cussì i Romans intal scuintri iniziâl par dopo fâju colâ intune imboscade; cun di plui la disposizion a arc e varès permetût ae formazion dai Gjai di cessâ in maniere graduâl sot dal atac roman, ma cence crevâsi, cemût che al sarès sucedût se a fossin stâts disponûts in linie. I Romans - che doi tierçs dai lôr efetîfs a jerin costituîts di reclutis inespertis, chei che si clamavin tirones - si jerin disponûts intune formazion tant compate, costrets ancje de nature dal teren, cun a pene un chilometri e mieç di front. Chest al à metût lis basis pe vitorie di Anibal, limitant la lôr mobilitât. Tes alis e steve la cavalarie, a Sud chê romane (2.400 cavalîrs) e a Nord chê aleade (3.600 cavalîrs). Altris circostancis contrariis ai Romans a jerin une pendence lizere dal teren in favôr dai punics e l'aiar contrari. La disposizion des trupis operade di Anibal e previodeve che i Romans a varessin provât di disfâ il centri, tignût di 19.000 tra Gjai e Iberics, aprofitant de grande supremazie numeriche (55.000 oms di fantarie). Tant che Anibal al veve previodût, i Gjai in curt a àn vût di cessâ. Ma, intant, la disfate romane si jere daûr a deventâ su lis alis. Anibal, di fat, al veve disponût lis sôs trupis di cavalarie intune formazion asimetriche: une ale (a Nord) di cavalarie numide di 3.600 unitât cun funzions di contigniment; chê altre, a Sud di cavalarie pesante di 6.500 cavalîrs cun funzions di grant impat, creant cussì une supremazie numeriche e tatiche de bande çampe dal so esercit, dulà che par altri la cavalarie romane e jere pressade tra il flum e lis trupis romanis che a vignivin indevant. La cavalarie pesante di Anibal e à cjariât trê voltis: cu la prime e à distrut la cavalarie romane a Sud, passant daûr dal front e tacant di daûr su la cavalarie aleade su la ale çampe dai Romans, sbaraiantle in maniere definitive; infin, dopo jessisi dade adun cu la cavalarie numide, e à sierât la tanaie cuntun atac daûr de masse de fantarie romane.

A chest pont la bataie e je stade un maçalizi. Cemût che al à riferît il storic Livi i Cartagjinês si son fermât dome cuant che «a son stâts stracs dal massacrâ plui che dal combati».