Valencia Club de Fútbol

Valencia
Nome	Valencia Club de Fútbol, S.A.D.
Alcume(s)	Los ches Valencianistas
Fundación	18 de marzo de 1919 (105 anos)
Estadio	Mestalla, Valencia, España
Inauguración	20 de maio de 1923
Capacidade	49.800
Propietario	Peter Lim
Presidente	Khojama Kalimuddin
Adestrador	Rubén Baraja
Liga	Primeira División
2019–20	9º
Vestimenta	Adidas
Na rede
http://www.valenciacf.es
Titular Alternativo Terceiro

O Valencia Club de Fútbol, S.A.D. (en valenciano: València Club de Futbol) é un club de fútbol español da cidade de Valencia. Fundouse o 18 de marzo de 1919 e actualmente compite na Primeira División de España.

Na Clasificación histórica da LFP o Valencia ocupa o 3º posto por detrás de Real Madrid e Barcelona. É o quinto club español con máis títulos nacionais (14 campionatos): 6 títulos de Liga, 7 Copas e unha Supercopa de España. E con 6 títulos europeos (1 Copa da UEFA, 2 Copas de Feiras, 1 Recopa e 2 Supercopas) é o cuarto equipo español con máis títulos internacionais. Ademais, formaba parte do conxunto de clubs máis importantes de Europa, o desaparecido G-14.

En 2011 era o 19º club máis rico do mundo, cuns ingresos de 116,8 millóns de euros, o cuarto equipo español por detrás de Real Madrid, Barcelona e Atlético de Madrid.

Ten 38.000 socios, á espera dunha nova ampliación, e máis de 800 peñas, é xa que logo o cuarto club en número de socios e peñas do país. Á vez, segundo a enquisa do CIS de xuño de 2014, o Valencia é o cuarto club de fútbol en porcentaxe en canto a simpatizantes en España (3,5%), unicamente por detrás de Real Madrid (37,9%), Barcelona (25,4%) e Atlético de Madrid (6,1%).

Historia

Fundación e debut nas competicións

O club xestouse o 5 de marzo de 1919, no céntrico Bar Torino, situado na rúa Barcelonina, por un grupo de seareiros que decidiron formar un novo club que representase á cidade de Valencia tras a desaparición do Club Valencia de fútbol anos antes. O 19 de marzo dese mesmo ano apróbanse oficialmente os Estatutos, nace así o Valencia Foot-ball Club. O 4 de abril constitúese a primeira Xunta Directiva, o primeiro presidente foi Octavio Augusto Milego Díaz, elixido ao chou lanzando unha moeda ao aire con Gonzalo Medina Pernas. O primeiro partido da historia disputouse contra o Gimnástico en Castelló e perdeuno o Valencia por 1-0.

Equipo do Valencia en 1927.

Durante a década de 1920 o Valencia disputa o Campionato Rexional, o cal gaña por primeira vez en 1923. Este título deulle a oportunidade de participar por primeira vez na Copa de España previa eliminación do Murcia FC nunha eliminatoria. O 16 de xaneiro de 1923 o Valencia comprou uns terreos por 316.439,20 pesetas ao barón de Bellver e o 20 de maio de 1923 inaugurouse o campo de Mestalla cun aforamento de 17.000 espectadores nun partido entre o Valencia FC e o FC Levante que concluíu con resultado de 1-0 para os locais. En 1928 iníciase o campionato de Liga e o Valencia xoga na Segunda División tras perder na eliminatoria previa contra o Racing de Santander. O equipo ché termina a tempada 1928/29 en quinta posición.

A década de 1930 está marcada pola Guerra civil española, tras a cal o campo de Mestalla quedou arrasado e houbo que reconstruílo. En 1934 o Valencia disputou e perdeu a súa primeira final de Copa contra o Real Madrid en Barcelona.

Éxitos nacionais e europeos

A década de 1940 foi posiblemente a mellor do club na súa historia. Tívose que castelanizar o nome do club a Valencia Club de Fútbol por orde da Delegación nacional de Deportes. O Valencia consegue o seu primeiro título nacional ao gañar a Copa do Xeneralísimo de 1941 ao Español por 3-1 na final. Na tempada 1941/42 o club gaña o primeiro Campionato de Liga da súa historia. Tamén se proclama campión nas tempadas 1943/44 e 1946/47. Os heroes desta década son Epi, Amadeo, Mundo, Asensi e Gorostiza quen integraban a xa mítica "Dianteira eléctrica". En 1949 gana de novo a Copa do Xeneralísimo.

Durante a década de 1950 vólvese a gañar outra Copa do Xeneralísimo na edición de 1954 e chega a outra final na de 1952. En liga o equipo pasa sen pena nin gloria polo campionato.

Na década de 1960 chegan os primeiros éxitos europeos ao gañar as Copas de Feiras das tempadas 1961/62 e 1962/63 a Barcelona e Dinamo Zagreb respectivamente. Tamén consegue unha nova Copa do Xeneralísimo en 1967 gañando na final ao Athletic.

A década de 1970 comeza cun novo título de liga na tempada 1970/71. En 1976 chega procedente de Rosario Central o dianteiro Mario Alberto Kempes, quen marcaría unha época no club. Na súa primeira tempada conseguiu o pichichi con 24 goles. Cun Kempes estelar o Valencia consegue a Copa do Rei de 1979 derrotando ao Real Madrid por 2-0 con 2 goles do Matador. En 1980 o Valencia conquista outro título europeo, a Recopa.

Anos difíciles

A pesar de que comezou cunha Recopa, a década de 1980 foi negra para o valencianismo. O club viuse obrigado a vender a Kempes ao River Plate. Debido ás obras en Mestalla polo Mundial de España 82 o club viuse inmerso nunha grave crise financeira. Na tempada 1982/83 o Valencia salvouse do descenso cun gol de Tendillo na última xornada ante o Real Madrid en Mestalla. A débeda seguiu aumentando ano a ano o que afectou ao rendemento deportivo do equipo. Na tempada 1985/86 o Valencia descende a Segunda División despois de máis de 50 anos na máxima categoría. Retorna tras un ano no inferno con Arturo Tuzón como presidente e un persoal repleto de xogadores da canteira. Con Tuzón na presidencia péchanse varias tempadas con superavit, polo que se vai reducindo a débeda aos poucos. No deportivo o equipo tamén se recupera e finaliza a tempada 1989/90 como subcampión.

A década de 1990 están marcados pola conversión obrigada do club en sociedade anónima deportiva en 1992. Tras a conversión chega á presidencia Paco Roig. No deportivo o equipo mantense nos postos de media táboa, con excepción da tempada 1995/96 na que finaliza segundo.

Época dourada

En 1999 o equipo volve gañar un título, a Copa do Rei, con Claudio Ranieri como adestrador. O Valencia eliminou en semifinais ao Real Madrid cun histórico 6-0 en Mestalla, antes de gañar ao Atlético na final.

Rafa Benítez, adestrador entre 2001 e 2004.

A entrada no século XX supón a segunda idade de ouro do Valencia. Na tempada 1999/00 chégase por primeira vez á final da Liga de Campións da UEFA. Tras pasar as dúas liguillas, superou a Lazio e Barcelona para chegar á final na que foi derrotado polo Real Madrid por 3-0. Ao ano seguinte repite final e logo de eliminar a equipos como o Arsenal e o Leeds United, perde na final contra o Bayern de Múnic, que arrebata o título aos valencianistas na quenda de penaltis.

Na tempada 2001/02, cun ata entón descoñecido Rafa Benítez como adestrador, o Valencia gaña de novo un título de Liga tras 31 anos. Na seguinte tempada perde a Supercopa, é eliminado na Copa do Rei e na Liga de Campións, e na liga acaba en quinta posición.

Con todo, a tempada 2003/04 foi a mellor da historia do Valencia coa consecución de dous títulos e dun terceiro en agosto de 2004. A dous xornadas para o final, o Valencia proclamábase campión de Liga por sexta vez na súa historia. O 19 de maio gañaba a final da Copa da UEFA contra o Olympique de Marsella (2-0), conseguindo o histórico dobrete. Tras o éxito, Rafa Benítez márchase ao Liverpool. O 27 de agosto gañaba a Supercopa de Europa por 2-1 ao Porto, con Claudio Ranieri como novo técnico na súa segunda etapa no Valencia.

Crise económica e actualidade

Maqueta do Nou Mestalla.

Partido disputado entre o Deportivo da Coruña e o Valencia CF.

A pesar da Supercopa gañada, en Liga o rumbo do equipo non é nada bo e Ranieri termina cesado. Ese mesmo ano chega á presidencia Juan Bautista Soler. Coa xestión de Soler o equipo entra nunha grave crise económica, que leva á paralización das obras do Nou Mestalla que o propio Soler puxo en marcha. Conséguese un novo título de Copa na tempada 2007/08, con todo ese ano en Liga o equipo vese envolvido na loita por evitar o descenso.

No verán de 2008 Soler coloca na presidencia a Vicente Soriano, quen asegura durante meses que ten unha solución para a situación económica do club. Tras un esperpéntico ano no social, con problemas de cobro para os xogadores e coa aparición dunha empresa pantasma uruguaia chamada Inversiones Dalport, as institucións valencianas ven obrigadas a desaloxar a Soler e Soriano do club mediante unha ampliación de capital levada a cabo polo presidente Manuel Llorente e Javier Gómez conseguindo estabilidade social. No deportivo, con Unai Emery como adestrador, o Valencia volve na tempada 2009/10 á Liga de Campións como terceiro clasificado. A tempada 2010/11 revalida o terceiro posto sen excesivos problemas cunha certa vantaxe respecto ao cuarto clasificado. Na tempada seguinte (2011/12) o Valencia consegue golear por 7-0 ao Genk belga en Liga de Campións, a pesar de non poder acceder á seguinte fase. Aínda así, consegue a terceira praza no seu grupo e accede á Europa League, onde volve ser eliminado polo Atlético de Madrid, esta vez en semifinais cun contundente 5-2 no global da eliminatoria. Esa tempada repite por terceiro ano consecutivo o terceiro posto na liga.

Uniforme

• Uniforme titular: Camiseta branca con detalles negros, pantalón negro, medias brancas.
• Uniforme alternativo: Camiseta laranxa con detalles negros, pantalón branco, medias laranxas.
• Terceiro uniforme: Camiseta azul, pantalón branco, medias azuis.

Himno

O himno do Valencia foi un encargo do club ao director da banda municipal de Valencia, Pablo Sanchez Torrella, que compuxo a música na forma tradicional valenciana, o pasodobre. A letra foi escrita por Ramón Gimeno Gil. Estreouse e tivo presentación oficial con motivo dos festexos do 75º aniversario do Club no Palau da Música o 21 de setembro de 1993.

Estadio

Panorámica de Mestalla durante un partido.

Artigo principal: Estadio de Mestalla.

Os primeiros anos trala súa fundación, o equipo adestrou e disputou os seus encontros no desaparecido campo de Algirós. No ano 1923 inaugurouse o estadio de Mestalla, que durante de 1969 a 1995 denominouse Luís Casanova na honra do histórico presidente. Ten capacidade para 55 000 espectadores, todos sentados, e unhas dimensións de 105 por 70 metros.

Actualmente está en construción o Nou Mestalla, que terá unha capacidade duns 75 000 espectadores.

Datos do club

• Tempadas en 1ª: 84 (incluída a 2018/19)
• Tempadas en 2ª: 4
• Tempadas en 2ªB: 0
• Tempadas en 3ª: 0
• Posto na Clasificación histórica da Liga: 3º
• Mellor posto na liga: 1º
• Peor posto na liga: 16º
• Partidos xogados en liga: 2.902
  • Gañados: 1 050
  • Empatados: 543
  • Perdidos: 767
  • Goles a favor: 3 926
  • Goles en contra: 3 089
  • Puntos: 2 902 puntos
  • Diferenza de goles: 837
• Maiores goleadas conseguidas:
  • Na casa:
    • Valencia 8-0 Sevilla FC (1943-44)
    • Valencia 8-0 Sporting de Gijón (1953-54)
  • Fóra:
    • Real Madrid 1-6 Valencia (1950-51)
    • Málaga CF 1-6 Valencia (2003-04)
• Maiores goleadas recibidas:
  • Na casa: Valencia 1-5 Athletic de Bilbao (1932-33).
  • Fóra: Sevilla 10-3 Valencia (1940-41)
• Máis partidos disputados: Fernando (552), Arias (500), Angulo (417), Cañizares (416).
• Máis minutos disputados: Fernando (51.811), Arias (45.454), Cañizares (37.957), Giner (37.094).
• Máis goles marcados: Mundo (206), Waldo (147), Kempes (145), Fernando (140).

Xogadores

Cadro actual

Actualizado a 2 de setembro de 2019.

Nº Posto País Xogador 1 POR Jaume Domènech 2 DEF Thierry Correia 3 DEF Jaume Costa 4 DEF Eliaquim Mangala 5 DEF Gabriel Paulista 6 MED Geoffrey Kondogbia 7 MED Gonçalo Guedes 8 MED Carlos Soler 9 DIA Kevin Gameiro 10 MED Daniel Parejo 11 MED Denis Cheryshev 12 DEF Mouctar Diakhaby

Nº Posto País Xogador 13 POR Jasper Cillessen 14 DEF José Luis Gayà 15 DIA Manu Vallejo 16 MED Lee Kang-in 17 MED Francis Coquelin 18 MED Daniel Wass 19 DIA Rodrigo Moreno 20 MED Ferran Torres 21 DEF Cristiano Piccini 22 DIA Maxi Gómez 23 DIA Rubén Sobrino 24 DEF Ezequiel Garay

• Os xogadores con dorsais maiores que o 25 poden alternar o primeiro equipo co filial.

Xogadores míticos

Eduardo Cubells Edmundo Suárez "Mundo" Epifanio Fernández "Epi" Antonio Puchades Ignacio Eizaguirre Quincoces II Waldo Machado Faas Wilkes Vicente Guillot Roberto Gil Paquito Manuel Mestre

José Claramunt Mario Alberto Kempes Fernando Morena Ricardo Arias Fernando Gómez Claudio "Piojo" López Gaizka Mendieta Amedeo Carboni Santiago Cañizares Rubén Baraja David Villa David Silva

Adestradores

O corpo técnico na tempada 2018-19 está composto polos seguintes membros:

	Adestrador:	Marcelino García Toral
	Adestrador asistente:	Voro
	Adestrador asistente:	Rubén Uria Corral
	Adestrador asistente:	José María Sanz Sánchez
	Adestrador de porteiros:	José Manuel Ochotorena
	Preparador físico:	Ismael Fernández Rodríguez
	Preparador físico:	Sergio García García
	Responsable dos equipos médicos:	Luis González Lago

Adestradores do Valencia CF

1923–1927: Antón Fivébr 1927–1929: James Herriot 1929–1931: Antón Fivébr 1931–1933: Rodolfo Galloway 1933–1934: Jack Greenwell 1934–1935: Antón Fivébr 1935–1936: Andrés Balsa 1939–1942: Ramón Encinas Dios 1942–1943: Leopoldo Costa "Rino" 1943–1946: Eduardo Cubells 1946–1948: Luis Casas Pasarín 1948–1954: Jacinto Quincoces 1954–1956: Carlos Iturraspe 1956–1958: Luis Miró 1958–1959: Jacinto Quincoces 1959–1960: Pedro Otto Bumbel 1960–1962: Domingo Balmanya 1962–1963: Alejandro Scopelli 1963–1964: Bernardino Pérez "Pasieguito" 1964–1965: Edmundo Suárez "Mundo" 1965–1966: Sabino Barinaga 1966–1968: Edmundo Suárez "Mundo" 1968–1969: José Iglesias "Joseíto" 1969–1970: Enrique Buqué - Salvador Artigas 1970–1974: Alfredo Di Stéfano 1974–1975: Milovan Ćirić 1975: Dragoljub Milošević 1975–1976: Manolo Mestre 1976–1977: Heriberto Herrera 1977: Manolo Mestre 1977–1979: Marcel Domingo 1979: Bernardino Pérez "Pasieguito" 1979–1980: Alfredo Di Stéfano 1980–1982: Bernardino Pérez "Pasieguito" 1982: Manolo Mestre 1982–1983: Miljan Miljanić 1983: Koldo Aguirre 1983–1984: Paquito García Gómez 1984–1985: Roberto Gil 1985–1986: Óscar Rubén Valdez 1986–1988: Alfredo Di Stéfano 1988: Roberto Gil 1988–1991: Víctor Espárrago 1991–1993: Guus Hiddink 1993: Francisco Real 1993–1994: Héctor Núñez 1994: José Manuel Rielo 1994: Guus Hiddink 1994–1995: Carlos Alberto Parreira 1995: José Manuel Rielo 1995–1997: Luis Aragonés 1997: Jorge Valdano 1997: José Manuel Rielo 1997–1999: Claudio Ranieri 1999–2001: Héctor Cúper 2001–2004: Rafael Benítez 2004–2005: Claudio Ranieri 2005: Antonio López Habas 2005–2007: Quique Sánchez Flores 2007: Óscar Fernández 2007–2008: Ronald Koeman 2008: Voro 2008–2012: Unai Emery 2012: Mauricio Pellegrino 2012–2013: Ernesto Valverde 2013: Miroslav Đukić 2014 : Juan Antonio Pizzi 2014–2015 : Nuno Espírito Santo 2015: Voro 2015–2016 : Gary Neville 2016: Pako Ayestarán 2016: Voro 2016: Cesare Prandelli 2016–2017: Voro 2017–2019: Marcelino 2019–2020: Albert Celades 2020: Voro 2020–2021: Javi Gracia 2021: Voro 2021–2022: José Bordalás 2022–: Gennaro Gattuso

Presidentes

1919-1922: Jorge Mainar 1922: Francisco Vidal Muñoz 1922-1924: Ramón Leonarte Ribera 1924-1925: Pablo Verdeguer Comes 1925-1929: Facundo Pascual Quilis 1929-1932: Juan Giménez Cánovas 1932-1933: Manuel García del Moral 1933-1935: Adolfo Royo Soriano 1935-1936: Francisco Almenar Quinzá 1939-1940: Alfredo Giménez Buesa 1940-1959: Luis Casanova Giner 1959-1961: Vicente Iborra Gil 1961-1973: Julio de Miguel y Martínez de Bujanda

1973-1975: Francisco Ros Casares 1976-1983: José Ramos Costa 1983-1986: Vicente Tormo Alfonso 1986-1993: Arturo Tuzón Gil 1993-1994: Melchor Hoyos Pérez 1994-1997: Francisco Roig Alfonso 1997-2001: Pedro Cortés García 2001-2004: Jaime Ortí Ruiz 2004-2008: Juan Bautista Soler 2008: Agustín Morera 2008-2009: Vicente Soriano 2009- : Manuel Llorente

Palmarés

Exposición dos trofeos do Valencia.

Torneos rexionais

• Campionato Rexional de Valencia (8): 1926, 1927, 1931, 1932, 1933, 1934, 1938, 1939
• Campionato de Levante (3): 1923, 1925, 1937
• Trofeo Feria de Julio (1): 1921

Torneos nacionais

• Liga de España (6): 1941-42, 1943-44, 1946-47, 1970-71, 2001-02, 2003-04
• Copa do Rei (8): 1941, 1949, 1954, 1967, 1979, 1999, 2008, 2019
• Supercopa de España (1): 1999
• Copa Eva Duarte (1): 1949
• Segunda División de España (2): 1930-31, 1986-87
• Subcampión da Liga de España (6): 1947-48, 1948-49, 1952-53, 1971-72, 1989-90, 1995-96.
• Subcampión da Copa do Rei (10): 1933-34, 1936-37, 1943-44, 1944-45, 1945-46, 1951-52, 1969-70, 1970-71, 1971-72, 1994-95
• Subcampión da Supercopa de España (3): 2002, 2004, 2008
• Subcampión da Copa Eva Duarte (1): 1947

Torneos internacionais

• Copa de Feiras (2): 1961-62, 1962-63
• Copa da UEFA (1): 2003-04
• Recopa de Europa (1): 1979-80
• Supercopa de Europa (2): 1980-81, 2004-05
• Copa Intertoto da UEFA (1): 1997-98
• Subcampión da Copa de Feiras (1): 1963-64
• Subcampión da Liga de Campións (2): 1999-00, 2000-01
• Subcampión da Copa Intertoto (1): 2005

Filial

Artigo principal: Valencia CF Mestalla.

O Valencia Mestalla é o primeiro equipo filial do Valencia. Foi fundado no ano 1944 e xurdiu coa idea de fornecer xogadores para o primeiro persoal do club. Debutou en Terceira División na tempada 1946-47 e ese mesmo ano logrou o ascenso a Segunda División, categoría na que xogou 21 tempadas na súa historia. Actualmente milita na Segunda División B.

De 2002 a 2004 o Valencia contou cun segundo filial, o Valencia C. Desapareceu ao baixar o Mestalla a Terceira División en 2004, arrastrando ao "C" a Preferente.

Véxase tamén

Ligazóns externas

• Páxina oficial do Valencia CF