Nuuk

Nuuk
Nuuk.
Standardo	Blazono
Lando:	Grenlando
Informo:
Latitudo:	64°10'53"N
Longitudo:	51°41'39"W
Altitudo:	5 m
Surfaco:	690 km²
Habitanti:	18 326 (2020)
Horala zono:	UTC-3:00 (UTC-2:00 dum la somero)
Urbestro:	Asii Chemnitz Narup
Mapo:

Portuo por bateleti en Nuuk.

Nuuk (Dane: Godthåb) esas la chef-urbo e maxim populoza urbo di Dana autonoma teritorio Grenlando. Ol ank esas la centro ekonomiala e kulturala dil insulo. Jacanta 64°10'53" norde e 51°41'39" weste e distanta 240 kilometri sude dil Arktika Polala Cirklo ol esas la maxim nordala chef-urbo de la mondo. Segun statistiki de 2020, ol havis 18 326 habitanti, equivalanta a cirkume 1/4 de tota habitantaro Grenlandana. Lua tota surfaco esas 690 km².

La vorto "Nuuk" signifikas "kabo" en la dialekto westala Grenlandana (Kalaallisut). Lua anciena nomo Godthåb devenas de Skandinaviana vorti signifikante 'bona espero'.

Historio

Statuo pri Hans Egede en Nuuk.

Vikingi veninta de Islando e Norvegia e komandita da Erik la Reda koloniigis la sud-westo di Grenlando dum la 10ma yarcento. Pos yarcenti, la komunitato di decendinti de Vikingi desaparis cirkume la 15ma yarcento, e la regiono komencis habitesar da aborijeni Inuit veninta de la nordo dil insulo.

Nuuk fondesis ye la 29ma di agosto 1728 da Norvegiana misionero Hans Egede, qua nomizis ol Godthåb. Egede fondis ol sep yari pos fiasko di koloniigo di vicina insulo, baptita Håbets Ø ("insulo dil Espero").

Komence, la koloniigo esis desfacila, nam epidemio di variolo decimacesis la habitanti Inuit, e mem mortigis la spozino di Egede, qua retroris a Norvegia poke pose. Ilua filiuli duris evangeliala laboro en Grenlando, e lora domo di la familio nun prezervesas kom muzeo.

Cirkume 1850, Grenlando, nome la regiono cirkum Nuuk, subisis krizo, nam Europani portis morbi e kulturo qua konfliktis kun tradicionala kulturo di Grenlandani. Multa Grenlandani vivis en povreso. En 1853, Dana geologiisto Hinrich Johannes Rink vizitis Grenlando e suprizesis pro ke lokala kulturo ed identeso supresesis sub Dana influo. Por respondar a ca situaciono, en 1861 ilu fondis Atuagagdliutt, l'unesma jurnalo di Grenlando, kun Grenlandano kom editero. Ca jurnalo, redaktita ed imprimita en Nuuk, pose divenis importanta simbolo di Grenlandana kulturo.