A ra me noiza

Co sto lustro bel de luna
vosto zone a caminà?
No te vies? varda cie una
me farasto chesta cà!

Presto donca zon te preo,
una bela ei da t’ in dì…
Zon Marieta, te fesc meo
che a sta a ciasa o zi a dormì!

Duto tage inz’ el paes,
dute dorme come tasc,
no in coscienza se no te es
no te lascio mai pì in pasc!

Una sera can ciatone
come chesta in duto l’ an…
cie te par Marieta zone?
Gnero scì? … da ca ra man!

No le cioudo anquoi, ne fiedo,
no le vento, le del ver…
una neola io no vedo…
le un bel tempo, le sinzier!

pagina:109
No te sentes cie aria fresca,
moe ra foies dei brascioi…
ʼna rosada che rinfresca
par ra vares l’ outigoi…!

Par a ciegies che res cianta
ra fouzigores cà e là…
Po… camina, no t’ impianta…!
Asto voia de pousà?

Oh! Marieta cie una bela
cie una cara che to sos…
Te somees una stela,
anzi mile se te vos…!

T’ as doi ocie tanto biei…
ie lugentes come el fò…
no se ciata i so fardiei
ca in Ampezo, ne a neò.

Inse duto el to bel vis,
t’ as un zerto no si cié…
me par de esse in paradis
co me scento pede te!

Se te disc una parola
de me voré ʼnʼ fre de ben,
el me cuor el se consola
el me souta ca inz’ el sen!

Te voi ben Maria t’ el zuro,
un ben proprio da marì:
oh no zerto, no seguro
no t’ in pos voré de pì!

Te me credes no le vero?
un baugion non son mai sta:
te sas ben che son sinziero
che no son bon de t’ inbroià…!