Kadhaton Windsor
Kadhaton Windsor punika astana abad tengahan lan dalemipun Karajan Britania Raya kanthi resmi ingkang mapan wonten ing Windsor, Berkshire, Inggris. Astana punika kawéntar awit saking asosiasi jangka dangu kaliyan kulawarga karajan Inggris lan ugi awit saking arsitèktur ingkang megah. Astana ingkang asli dipunyasa sasampunipun invansi Norman déning William Sang Penakluk. Nalika masa pamaréntahan Henry I, pura punika dipun-ginakaken kanggé dalem kulawarga Karajan Inggris lan dados pura paling dangu ingkang dipunnggèni ing Éropah.
Arsitèktur kastil ingkang megah punika dipungambaraken déning sejarawan seni Hugh Roberts minangka Arsitektur luar biyasa ingkang boten ketandingan ing Eopa [1]. Wangunan astana kalebet Kapel St George ingkang dipunyasa nalika abad kaping 15. Langkung saking gangsal atus tiyang ingkang mapan lan nyambut damel ing Windsor saéngga ndadosaken astana kuna ingkang dinggèni paling ageng ing donya.
Ing wiwitanipun, astana punika karancang kanggé nglindungi dominasi Norman saking sakiwa-tengené pinggiraning kutha London. Kajawi punika kanggé ngawasi pérangan strategis ingkang wigati ing Kali Thames. Kanthi bertahap struktur yasan banjur dipun-gantos kanthi bètèng watu. Bèntèng punika tahan nalika pangepungan ingkang dangu nalika Perang Baron I ing wiwitan abad kaping 13. Henry III banjur yasa astana ingkang mewah ing dalem kastil nalika abad tengahan. Edward III ugi ngembangaken astana dados langkung megah, ingkang pembanungan kala punika dipunwastani dados proyek yasan ingkang paling awis ing Abad Tengahan ing Inggris[2]. Nalika ing periode Tudor, Henry VIII lan Elizabeth I ningkataken pangginaan kastil minangka astana resmi karajan lan pusating hiburan diplomatik.
Astana Windsor saged slamet saking periodé ingkang kebak kaliyan gejolak nalika Perang Saudara Inggris. Bèntèng punika kaginakaken minangka markas militèr kanggé wadyabala Parlemen lan kunjara kanggé Charles I. Nalika ing era Restorasi, Charles II nata malih Astana Windsor kanthi pambiyantu saking arsitek Hugh May, nyipta satunggal kompleks yasan megah lan interior Barok ingkang taksih jumeneng dumugi sapunika.
Ing abad kaping 18, George III lan George IV ngrenovasi lan yasa malih yasan astana Charles II kanthi béaya ingkang ageng. Asilipun desain ingkang sapunika dados apartemen nagara kanthi Gaya Rococo, Gotik, lan Barok. Ratu Victoria damel éwah-éwahan alit ing astana kanthi ndadosaken pusat hiburan karajan nalika masa pamaréntahanipun. Astana Windsor kaginakaken kanggé papan berlindung kanggé kulawarga karajan nalika wonten pangeboman Jerman Nazi dhateng London ing Perang Dunia II lan slamet saking kobongan ageng taun 1992. Sapunika astana punika dados atraksi wisata ingkang kawentar ing Inggris, papan kanggé njamu kunjungan kanagaran, lan papan kanggé liburan ingkang dipunremeni déning Ratu.
Pranala njawi
[besut | besut sumber]- Windsor Castle, Official website of the British monarchy
- Windsor Castle, The Royal Collection - Visitor Information