Mur grande de Xina
La Mur grande de Xina es un serie de fortreses fabricada de petra, brice, tera presada, lenio, e otra materiales, jeneral construida longo un linia este a ueste contra la bordas norde de Xina per proteje la statos e imperos xines contra la atacas e envades de la nomadas variosa de la stepes ci ia desira estende se. Alga mures ia es construinte de tan temprana ca la sentenio 7 aec. Estas ia es plu tarde liada con lunlotra e grandida par Qin Shi Huang (220-206 aec), la imperor prima de Xina. No multe de acel mur resta. Plu tarde, multe dinastias suguente ia repara, manteni, e construi nova estendes multiple de la mures de la borda. La partes de la mures la plu bon conoseda ia es construida en la dinastia Ming (1368-1644 ec).
Estra defende, otra intendes de la Mur ia inclui controla de la bordas, permetente la imposa de impostas sur benes transportada longo la Via de seda, regula o coraji de comersia, e controla de migra en e de Xina. Plu, la cualias defendal de la Mur ia es bonida par la construi de la tores de garda, casernas de soldatos, garnisones, siniali par foco o fuma, e la fato ce la via de la Mur grande ia es ance un coredor de transporta.
La mures a la frontera construida par dinastia diferente ia ave cursos multiple. Colieda, los estende de Dandong en la este a Lago Lop en la ueste, de la borda moderne entre Xina e Rusia en la norde a Qinghai en la sude; longo un arco cual defini aprosima la borda de la stepe mongol. Un studia arceolojial, usante tecnicas avansada, ia conclui ce la mures construida par la dinastia Ming mesura 8850 km. Esta inclui 6259 km sesiones de mur mesma, 359 km de fosos, e 2232 km de paradores natural como colinas e rios. Un otra studia trova ce la mur intera con tota sua ramos mesura 21,196 km. Oji, la Mur grande de Xina es jeneral reconoseda como un de la atenis de arciteta la plu impresante en istoria.