Odin

Odin, de la norsce vea Óðinn, es un dio multe adorada en mitolojia germanica. En mitolojia norsce, de cual deriva la plu informa survivente sur la dio, Odin es asosiada con sajia, sani, moria, renia, la pendador, sabe, gera, batalia, vinse, sorsoria, poesia, panica, e la runas, e es la sposo de la diva Frigg. En la mitolojia estende germanica e paganisme, la dio es ance conoseda como Woden en engles vea, Wodan en sason vea, e Wuotan en deutx alta vea, tota desendente de la protogermanica reconstruida *wōđanaz.

Odin es un dio spesial notada tra la istoria rejistrada de la popla germanica, de la ocupa par la romanes de rejiones de Germania, a la estendes tribal de la periodo de migra e la eda de vicinges. En la eda moderna, Odin ia continua es notada en la folclor campanial de Europa germanica. Referes a Odin apare en nomes de vilas, lagos, rios, etc, tra la rejiones abitada istorial par la popla germanica antica, e la nom de la dia de la semana en alga linguas germanica - wednesday, woensdag, woansdei, onsdag - per mercurdi, en la mesma modo par cual la linguas romanica usa la dio roman Mercurio.

Es testos en engles vea, Odin ave un rol spesial como un figur asendente umanida entre reales, e el es frecuente refereda como la fundor entre otra popla germanica, como la langobardas. Formas de sua nom aveni comun tra la arcivo germanica, an si naras de Odin es xef trovada en la obras en norsce vea de Island, de sirca la sentenio 13, cual composada ance la plu de nosa comprende moderna de mitolojia norsce.

En testos de norsce vea, Odin es representada con un oio e un barba longa, comun brandinte un lansa nomida Gungnir e portante un capo e xapo larga. El es comun acompaniada par sua animales familial - la lupos Geri e Freki e la corvones Huginn e Muninn, ci trae informa a el de tota Midgard - e monta la cavalo Sleipnir, ci ave oto gamas e pote vola, tra la sielo e en la mundo suteran. Odin es la fio de Bestla e Borr, e ave du fratos, Vili e Ve. Odin es atestada como avente multe fios, la plu famosa esente Thor (con Jord) e Balder (con Frigg), e es conoseda par sentos de nomes. En esta testos, el comun xerca per conose plu grande, a veses desemblada (la plu famosa par oteni la idromel de poesia), e aposta con sua sposa Frigg sur la resulta de sua aventuras. El ave un rol en la crea de la mundo par mata la esente primal Ymir, e la dona de vive a la du umanas prima Ask e Embla. Odin ave un asosia spesial con Yul, e la sabe par umanas de ambos la runas e poesia es atribuida a el, cual dona a Odin aspetas de la eroe cultural.

En la testos norsce vea, esentes fema asosiada con la campo de batalia - la valkyrias - es ance liada a Odin, ci rena sur Valhala, do es reseta dui de los ci mori en batalia - la einherjar. La otra dui es elejeda par la diva Freia per sua rena Folkvangr. Odin consulta la testo balsamida en erbas de la esente sajia Mimir per consela, e en la avenis prediseda de Ragnarok, Odin es instruida per gida la einherjar a batalia ante ce el es comeda par la lupo monstrin Fenrir. En folclor plu tarda, Odin apare como la xef de la xasa savaje, un prosede de la fantasmas de la mores tra la sielo de inverno. El es asosiada con fetixes e otra formas de majia, spesial en la testos vea.

Odin es frecuente la sujeto en studias germanica, e multe teorias ia es proposada regardante sua developa. Alga de estas foca sur la relata spesifada de Odin a otra carateres, per esemplo, la fato ce la sposo de Freia, Óðr (Od), ave un nom simil a Odin, e ce la sposa de Odin, Frigg, es un multe modods simil a Freia, e ce Odin ave un relata spesial a la dio Loki. Otra studias foca sur la ro de Odin en la arcivo istorial, un demanda comun consernante si Odin deriva de la relijio protoindoeuropean, o si el ia developa plu tarda en la sosia germanica. En la eda moderna, Odin ia inspira multe obras de poesia, musica, e otra formas de media. El es adorada en la plu formas de la relijios pagan nova, con otra dios adorada par la popla germanica antica; alga ramos foca spesial sur Odin.

Odin es comun notada como un de la inspiras temprana per alga tradisiones moderna de natal en Europa, spesial en paises germanica, e cual ia continua con la coloni de America Norde, e la model per Santa Claus.