Harderwijk

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Harderwijk in Gelderland

Harderwijk (Wes-Veluws: Harderwiek) is 'n klein stad en gemeinte in de Nederlandse provincie Gelderland, op de Veluwezoom, mèt 'n oppervlak vaan 48,27 km² (daovaan 9,81 km² water) en (per 1 januari 2007) 42.057 inwoeners. Binne de gemeinte ligke gein ander kerne.

Stadsfuncties

Harderwijk, wat oongeveer midde tösse Amersfoort en Zwolle ligk, heet 'n centraol verzörgingsfunctie veur de noordwesteleke Veluwe. De vèsvangs vaan vreuger is door d'n aonlag vaan Flevoland gestop. Harderwijk is daodoor allewijl mie geriech op industrie, deensverliening en zeker ouch toerisme. Harderwijk steit bekind um zie Dolfinarium. De stad heet 'n statie aon de lijn Amersfoort-Zwolle.

Stadsgeziech

De binnestad vaan Harderwijk is in 1969 tot besjèrmp stadsgeziech oetgerope. De Groete Kèrk is 'n laat-gotische dreibeukege basiliek oet de veertiende en vieftiende iew. Oet dezelfde periode dateert 't veurmaoleg Sint-Catherinakloester mèt kepel oet 1502. Vaan de middeliewse walmör zien nog de Vèspoort en e paar stökker aon de zuidkant vaan de aw stad. 't Vaan oorsproonk middeliews raodhoes mèt achtiende-iewse raodszaol is in de negetiende iew in neoclassicistische stijl verbouwd. Ander bezeensweerdeghede zien 't Peshoes, 't Linnaeusteurieke en 'n aontal hierehoezer.

Historie

't Vèssersdörp Harderwijk kraog in 1231 stadsrechte. 't Góng deil oetmake vaan de Hanze en bleujde op tot 'n belangrieke handelsstad. Vaan 1648 tot 1811 waor Harderwijk de vestegingsplaots vaan 'n universiteit, die es twiederangs bekind stoont meh väöl succes had. Oonder mie Linnaeus promoveerde aon dees universiteit. De economische beteikenis verveel, al bleef Harderwijk wel de belangriekste plaots op de westeleke Veluwe. In 't midde vaan de twintegste iew woorte de zuideleke IJsselmeerpolders aongelag, zoetot vèsvangs haos oonmeugelek woort.

Gebore in Harderwijk

• Joost Eerdmans, politicus
• Jan Douwe Kroeske, presentator

Externe link

• Website vaan de gemeinte