Inntekt er pengar som kjem inn. Det er pengar ein tener eller får. Både personar, bedrifter og land må ha inntekter.
Ein plan for korleis ein skal bruke inntekter, blir kalla budsjett. Inntekter som blir brukte heime er ein del av privatøkonomien. Bedrifter set opp bedriftsbudsjett, og land set opp statsbudsjett.
Det ein bruker inntektene på, blir kalla utgifter.
Mange får inntekt frå løna dei får for å jobbe. Kor mykje ein tener, kjem an på kva slags jobb ein har og kor mykje ein jobbar. Om ein har fast jobb, får ein òg fast inntekt. Biletet syner ein lege, som jobbar i ambulanse.
Faste inntekter er pengar som kjem inn på konto regelmessig. Det kjem ofte like mykje pengar kvar gong. Pengane kjem for eksempel inn på ein fast dag kvar månad.
For personar og familiar er ofte dei faste inntektene
Dersom ein leiger ut noko ein eig, til dømes ein hybel, kan ein få faste inntekter. Den som bur i hybelen, betaler husleige kvar månad.
For barn og ungdom kan vekepengar vere ei fast inntekt. Foreldre kan gje barna sine ein sum kvar veke, kanskje for å gjere husarbeid heime.
Variable inntekter er pengar ein tener av og til, til dømes om ein sel klede, eller andre eigedelar, eller vinn i lotto. Ein kan òg ta på seg ein liten ekstrajobb, som å sitje barnevakt, mot betaling.
Nesten alle som har inntekt, betaler skatt. Både bedrifter og personar må betale skatt.
Alle vaksne må betale skatt av lønn, pensjon og trygd. Skatten blir trekt ifrå lønna, før ein får utbetalt pengane. Det som er att av inntektene, når skatten er trekt ifrå, heiter nettoinntekt. Bruttoinntekt er lønna før skatten er trekt ifrå.
Kor mykje skatt ein må betale, kjem an på kor mykje ein tener og eig. Dei som tener mest pengar, må betale mest skatt. Dei som tener svært lite pengar, kan sleppe å betale skatt. Barn og ungdom slepp som regel å betale skatt.
Skatten blir betalt inn til staten. Staten bruker desse pengane i statsbudsjettet.
Det finst mange måtar å tene pengar på. Å selje ting gjev inntekt. For butikkar og mange bedrifter, er inntekt frå sal det viktigaste. Men sal gjev ikkje alltid fast inntekt, for det kan variere kor mykje ein klarer å selje.
Pengar ein får i gåve, arvar eller vinn, kan òg vere ei inntekt.
Inntekt som kjem frå pengar ein allereie har, heiter kapitalinntekt. Det kan vere renter ein får i banken, når ein sparer. Dersom renta til dømes er to prosent, vil ein tene to kroner i året for kvar hundrelapp ein har spart.
Å eige aksjar eller fond kan gje inntekter. Då tener ein pengar, dersom bedriftene ein eig ein del av, gjer det godt og aukar i verdi.
