fjert, fis, flatus
Promp er gass som blir laga i tarmen og sleppt ut gjennom rumpeholet.
Alle menneske prompar. I gjennomsnitt slepper eit menneske ut ein desiliter fis per time. Det er heilt normalt. Som regel er det så lite kvar gong at ein ikkje merkar det sjølv. Nokre gonger kjem det ut så mykje at ein sjølv, og dei som er rundt, kan lukte det. Nokre gonger kjem det òg lyd, når prompen kjem ut.
Gassane i prompen blir laga i tynntarmen og tjukktarmen i kroppen. Det skjer når bakteriar bryt ned næring frå maten, særleg karbohydrat. Nokre matvarer er vanskelege for kroppen å fordøye sjølv. Desse kan bakteriar ete og lage gassar av. Det kan til dømes vere belgfrukter og kål.
Under fordøyinga blir det danna fleire typar gass. Vanlegvis blir det danna mest hydrogen og karbondioksid. Desse luktar ikkje noko. Men bakteriane lagar òg mindre mengder metan og merkaptan. Desse gassane luktar vondt.
Om ein har veldig mykje gass i magen, kan det gjere vondt. Nokre synest òg det er flautt å prompe så andre høyrer eller luktar det.
Nokre sjukdommar kan gi meir luft i magen, til dømes viss ein er allergisk mot mat eller har feil bakteriar i magen. Laktoseintoleranse og cøliaki er to sjukdommar i tarmen, som kjem av ein type allergi. Om ein ofte har mykje gass i magen, kan ein gå til legen og få hjelp.
