Democracie
Democracie ye un regime de goberno adonde l poder de tomar amportantes decisones políticas stá cun ls cidadanos ([[../pobo/]]), direta ó andiretamente, por meio de repersentantes eileitos — forma mais ousada. Ua democracie puode eisistir nun sistema persidencialista ó parlamentarista, republicano ó monárquico.
La Democracie ye l cuntrário de la [[../ditadura/]] i de l [[../totalitarismo/]], adonde l poder stá antregue a ua eilite outo-eileita.
Las Democracies puoden ser debedidas an defrentes tipos, cun assento an bárias çtinçones. La çtinçon mais amportante dá-se antre [[../democracie direta/]] (alguas bezes chamada "democracie pura"), adonde l pobo diç la sue buntade pul boto direto an cada assunto particular, i la [[../democracie repersentatiba/]] (alguas bezes chamada "democracie andireta"), adonde l pobo diç la sue buntade atrabeç de la eileiçon de repersentantes que tóman decisones an nome daqueilhes que ls eilegírun.
Outras cousas amportantes na democracie ténen tamien a ber cun quien ye "l Pobo", esto ye, quien ten dreito al boto; cumo defender ls dreitos de minories contra la "tiranie de la maiorie" i qual l sistema que debe de ser ousado para la eileiçon de repersentantes ou outros eisecutibos.
Democracie Repersentatiba i Democracie Direta
Ber artigo percipal: [[../Democracie direta/]]Democracie direta ten a ber cul sistema adonde ls cidadanos decíden diretamente cada assunto por botaçon. An [[|../democracie repersentatiba|democracies repersentatiba/]]s, al cuntrário, ls cidadanos eilígen repersentantes an anterbalos rigulares, que apuis decíden ls assuntos a fabor deilhes.
La democracie direta tornou-se cada beç más defícele, i aprossima-se mais de la democracie repersentatiba, quando l númaro de cidadanos crece. Storicamente, las democracies mais diretas anclúen l ancontro munecipal de [[../Nuoba Anglatierra/]] (drento de l [[|../Stados Ounidos de la América|Stados Ounidos]]) , i l antigo sistema político de [[../Atenas/]]. Nanhun destes baterie cierto cun ua grande populaçon (anque la populaçon de Atenas fusse grande, la maiorie de la populaçon nun era cumpuosta de pessonas cunsideradas cumo cidadanas, que, portanto, nun tenien dreitos políticos; nun ls tenien las mulhieres, ls scrabos i ls ninos).
Ye questionable se yá houbo algun die ua democracie puramente direta dua grandura cunsiderable. Na prática, sociadades de qualquiera cumplexidade siempre percísan dua specializaçon de oufícios, mesmo de ls admenistratibos; i portanto ua democracie direta percisa de giente eileitos. (Anque alguien puoda tentar mantener todas las decisones amportantes feitas por boto direto, cun ls admenistratibos solo a lhebar a la prática essas decisones). Eisemplos de democracie direta que questumában eilegir Delgados cun mandato amperatibo, rebogable i temporário puoden ser ancuntrados an albrotes i reboluçones de sentido anarquista cumo la [[../Reboluçon Spanhola/]], la [[../Reboluçon Oucraniana/]] i ne l albrote armado de la [[../EZLN/]], ne l stado de [[../Chiapas/]].
De l mesmo modo, muitas democracies repersentatibas modernas aceitórun alguns eilemientos de la democracie direta, normalmente [[../referendo/]].
Nós podemos ber democracies diretas i andiretas cumo ls tipos eideales, cun las democracies reales ban se aprossimando uas de las outras. Alguas antidades políticas modernas, cumo la [[../Suíça/]] ou alguns [[|../Stados Ounidos de la América#Subdebisones|stados amaricanos]], adonde ye mui ousado l referendo ampeçar por ua petiçon (chamada [[../referendo por demanda popular/]]) alrobés de nembros de la legislatura ó de l goberno. La redadeira forma, que ye frequentemente coincida por [[../plebecito/]], premite al goberno scolher se i quando ha de mantener un referendo, i tamien cumo la question debe ser abordada. An cuntraste, la [[../Almanha/]] stá mui próssima dua democracie repersentatiba eideal: na Almanha ls referendos son proibidos -- an parte por bias de la mimória de cumo [[../Adolfo Hitler/]] ousou esso para manipular plebecitos an fabor de l sou goberno.
L sistema de eileiçones que fui ousado an alguns países [[|../capitalismo de Stado|capitalistas de Stado]], chamado [[../centralismo democrático/]], puode ser cunsidrado cumo ua forma strema de democracie repersentatiba, adonde l pobo eilegie repersentantes locales, que por sue beç eilegien repersentantes regionales, que por sue beç eilegien la assemblé nacional, que finalmente eilegie ls que íban a gobernar l paíç. Assi i todo, alguns cunsídran que esses sistemas nun son democráticos na berdade, mesmo que las pessonas puodan botar, yá que la grande çtáncia antre l andebíduo eileitor i l goberno premite que se tornasse fácele manipular l porcesso. Outros cuntrapónen, dezindo que la grande çtáncia antre eileitor i goberno ye ua caratelística quemun an sistemas eileitorales zenhados para naciones gigantescas (ls [[|../Stados Ounidos de la América|Stados Ounidos]] i alguas poténcias ouropeias, solo para dar alguns eisemplos cunsidrados sien dúbeda cumo democráticos, ténen porblemas sérios na democraticidade de las sues anstituiçones de topo), i que l grande porblema de l sistema sobiético i de outros países quemunistas, aqueilho que l tornaba berdadeiramente nó-democrático, era que, an beç de séren scolhidos pul pobo, ls candidatos éran ampuostos pul partido derigente.
La democracie ye ua cousa buona?
Quaijeque todos ls stados hoije apóian la democracie an percípio, anque giralmente nó na prática. Mesmo muitas ditaduras quemunistas chamában-se a eilhas mesmas democracies populares (p.eis. la "República Democrática de l Bietname", "República Democrática Popular de la Coreia"), anque de modo algun séian democráticas de l punto de bista de la maiorie de l oucidentales. Ua de las fraquezas apuntadas a la Democracie ye l fato de nun premitir que oujetibos lhançados por un goberno a lhargo prázio, mesmo que séian eissenciales pa l porgresso/bien star de l cidadanos, nun puodan ser puostos de lhado pul goberno seguinte, adiando assi decisones amportantes, ó seia, nun premite que haba un rumo para la nacion an causa.
Alguas eideologies stan abiertamente contra la democracie, por eisemplo, l [[../Facismo/]].
Mas cunsidra-se que la democracie, por ser aceita por defrentes países i stados, ye ua cousa buona i aceita cun muitas nomes.
Dreito de Boto
L [[../boto/]] ye típico de l [[../Stado lhibaral/]] ([[../seclo XIX/]]) i eisigie que ls sous titulares respeitássen ciertas eisigenças cumo pagar ampuostos diretos; porpiatários de porpiadade fundiária i tener ua cierta renda.
Ne l passado muitos grupos fúrun scluídos de l dreito de boto, an bários nibles. Alguas bezes essa scluson ye ua política bastante abierta, claramente çcrita nas leis eileitorales; outras bezes nun ye claramente çcrita, mas ye lhebada na prática por meios que parécen tener pouco a ber cun la scluson que stá mesmo a ser feita (p.s., ampuostos de boto i eisigenças de alfabetizaçon que mantenien [[../afro-amaricanos/]] loinge de ls caixones de boto antes de la era de ls [[../dreitos cibiles/]]). I alguas bezes a un grupo era premitido l boto, mas l sistema eileitoral ó anstituiçones de l goberno éran ourganizadas d'aperpósito pa le dar menos anfluença que outro grupos faborecidos.
Oubrigatoriedade de l boto
An alguns países, l boto nun ye un dreito, mas ua oubrigaçon.
La prática de l boto oubrigatório ben yá de la [[|../Stória de la Grécia|Grécia Antiga]], quando l legislador ateniense [[../Sólon/]] fizo aprobar ua lei a oubrigar ls cidadanos a scolher un de l partidos, causo nun quejíssen perder ls sous dreitos de cidadanos. La medida fizo parte dua reforma política para atamar la radicalizaçon de las çputas antre façones que debedien la pólis. Para alhá de acabar cula scrabidon por díbedas i çtribuir la populaçon cunsante la sue renda, criou tamien ua lei que ampedie ls cidadanos de se abstenéren nas botaçones de l'assemblé, senó perdien ls sous dreitos.
Scluson Étnica
Muitas sociadades ne l passado negórun a ciertas pessonas l dreito de botar por pertencéren a un cierto grupo étnico. Eisemplo desso ye la scluson de pessonas que tenien sue ua ourige Africana, antes de la de ls [[../dreitos cibiles/]], i ne l tiempo de l [[../apartheid/]] na [[../África de l Sul/]].
L mais de las sociadades hoije nun manténen essa scluson, mas alguas inda la fázen. Por eisemplo, [[../Fiji/]] reserba un cierto númaro de talhos ne l Parlamento para cada un de l percipales grupos étnicos; essas sclusones fúrun adotadas para çcriminar antre índios a fabor de ls grupos étnicos fijianos.
Scluson de classes
Até l seclo XIX, muitas democracies oucidentales tenien critérios de qualificaçon nas sues leis eileitorales, l que senificaba que solo pessonas cun un cierto grau de riqueza podien botar. Hoije essas leis fúrun rebogadas.
Sclusones de género
Outra scluson que durou muito tiempo fui la assente ne l sexo. Todas las democracies nun le dában l boto a las mulhieres até [[../1893/]], quando la [[../Nuoba Zelándia/]] se tornou l purmeiro paíç de l mundo a dar a las mulhieres l dreito de boto ne ls mesmos termos de ls homes. Esso acunteciu debido al sucesso de l [[../mobimiento femenino pul dreito de boto/]]. Hoije praticamente todos ls stados premíten que mulhieres bóten; las únicas eicepçones son siete stados [[|../Islamismo|muçulmanos]], percipalmente ne l [[../Médio Ouriente/]]: [[../Arábia Saudita/]], [[../Barein/]], [[../Brunei/]], [[../Kuwait/]], [[../Oman/]], [[../Qatar/]] i [[../Eimirados Árabes Ounidos/]].
Dreito de boto hoije
Hoije, an muitas democracies, l dreito de boto ye garantido sin çcriminaçon de raça, grupo étnico, classe ou sexo. Assi i todo, l dreito de boto inda nun ye ounibersal. Solo l ténen las pessonas cun ua cierta eidade, normalmente 18 (anque an alguns lhugares puoda ser 16 -- cumo ne l Brasil -- ó 21). An regra, solo ls cidadanos dun paíç puoden botar an sues eileiçones, inda quembora uns países fágan scepçones la cidadones de outros países cun que téngan laços próssimos (p.s., alguns nembros de la [[../Quemunidade Británica/]], i nembros de la [[../Ounion Ouropeia/]].
Outros causos
L dreito de boto normalmente ye negado a prijoneiros. Alguns países tamien le négan l dreito de boto a cundenados por crimes grabes, mesmo apuis de lhibartados. An alguns causos (p.eis. an muitos stados de ls [[|../Stados Ounidos de la América|Stados Ounidos]]) la negaçon de l dreito de boto ye outomático na cundenaçon de qualquiera crime grabe; an outros causos (p.eis. an países de la [[../Ouropa/]]) la negaçon de l dreito de boto ye ua penalidade adecional que l tribunal puode amponer, para alhá de la pena de cadena.
Democracies alredror de l Mundo
Ye defícel saber l númaro de democracies na atualidade. La lhinha que debide regimes democráticos de regimes outocráticos ye andeble. Muitos países (p.eis. [[../Singapura/]]) ténen eileiçones que parécen lhibres, adonde l partido de goberno bince siempre, normalmente acumpanhado por eideias ó eibidéncias de represson a qualquiera ouposiçon al goberno. Nesses países parece haber las chamadas "democracies dun solo partido"(anque ls tenermos democracie i monopartidarismo nun séian antagónicos) .
Assi i todo, tentatibas houbo para saber l númaro de democracies. De acordo cun la [[../Casa de la Lhiberdade/]], na fin de l anho [[../2000/]] haberie 120 democracies ne l mundo.
Democracie crestiana
Ber artigo percipal: [[../Democracie crestiana/]]La [[../Democracie crestiana/]] ye ua eideologie i mobimiento político que defende ua [[../democracie/]] assente ne ls ansinamientos i prencípios crestianos. Naciu na fin de l [[../seclo XIX/]], apuis la ancíclica [[../Rerum Novarum/]], i ye ua fuorça política amportante na [[../Ouropa/]] i na [[../América Lhatina/]].
Ber tamien
- [[../Cidadanie/]]
- [[../Ciber-democracie/]]
- [[../Democracie ateniense/]]
- [[../República/]]
- [[../República Romana/]]
- [[../Social democracie/]]