Suebos
Ls suebos fúrun un de ls pobos qu'acupórun la Spánia durante las Ambasones bárbaras, fundando un reino na antiga porbíncia romana de la Galécia (atual norte de Pertual i Galiza) que durarie antre ls anhos 409 la 585 d.C., data an que fui aneixado puls Besigodos. Ls suebos éran un pobo germano ouriundo de la region antre ls rius Eilba i Oder, na Almanha. L storiador romano Tácito chegou a referir-se a todos ls germanos de para alhá-Elba cumo "suebos". Apuis, i cun outras tribos de defrentes etnies, partecipórun na fundaçon de la Suábia ne l sul de la Almanha.
Fundaçon de l Reino Suebo
[eiditar | eiditar código-fuonte]Ls suebos chegórun a la Península Eibérica an 409, a la par cun outros ambasores germánicos – bándalos, búrios i culs alanos (nó-germánicos) i apuis ls besigodos, nua migraçon zancadenada pula fuga a la çtruiçon por bies de ls hunos antre ls anhos 372 i 375. Ls suebos cruzórun ls Pirenéus i fundórun un reino, cun capital an Bracara Augusta, l qual, na sue mássima stenson, anglobaba la totalidade de la porbíncia de la Galécia i la parte norte de la Lusitánia, até al Teijo. L território mais a sul fui acupado puls besigodos. Ls suebos anstalórun-se percipalmente an torno de cidades cumo Bracara Augusta (Braga), Portus Cale (Porto), Lucus Augusta (Lugo) i Asturica (Astorga). An 438 l rei suebo Heirmerico rateficou la paç culs pobos galaicos i, cansado por ua bida de luitas, yá que quemandaba ls suebos zde quando estes antrórun na Península Eibérica, abdicou an fabor de sou filho Réquila I.
An 448 Réquila morriu, deixando un stado an spanson la sou filho Requiário que, sendo católico, ampuso este credo a la populaçon sueba. La populaçon ourbana de la Galécia era yá predominantemente católica. La cidade de Braga cumo capital de l reino suebo i sede eipiscopal ganhou grande amportança, la qual inda hoije ye besible ne l carátere metropolita de la sue Sé, primaç antre las dioceses de l Noroeste peninsular.
Ls suebos i la cidade de l Porto
[eiditar | eiditar código-fuonte]Cerca de l'anho de 417, ls alanos ambadírun ls territórios de ls Suebos, ampurrando estes até a la borda dreita de l riu Douro, adonde hoije queda la cidade de l Porto. Ls alanos nun cunseguírun, anque muitos sfuorços, cunquistar la cidade, sendo mais tarde spulsos pul pobo suebo, cul apoio de ls romanos. Heirmerico, l rei suebo, stendiu ls muros de l castielho, que fundara ne l morro de la Pena Bentosa (adonde atualmente stá la Sé), eidificando a la sue buolta casas pa las tropas. A este burgo fui dado l nome de Cale Castrum Novum (castielho nuobo de Cale) adquerindo l nome de cebitas. Al fondo desse morro eisistie l Portus Cale (porto de Cale, atual Rieira), que dou ourige al nome Portucale, nome esse dado al castielho nuobo, i que quedarie a chamar la cidade a partir de ls finales de l seclo IV. L castielho antigo quedaba de l'outro lado de l riu Douro, ne l local de Bila Nuoba de Gaia, puosto de defesa abançado de Cale.
Queda de l reino suebo
[eiditar | eiditar código-fuonte]
An 456 Requiário I muorre i bários pretendentes aparécen, agrupados an dues façones. Nota-se ua debison marcada pul riu Minho, probabelmente un reflexo de las dues tribos, quados i marcomanos, que custituian la nacion sueba na Península Eibérica.
An 585 ls bisigodos çtroçórun ls suebos i acaçórun sou rei, Andeca. L reino suebo fui aneixado pul Reino Besigodo de Toledo, mas probabelmente susistiu un cierto grau d'outonomie. Segundo las crónicas de Fonso III, anquanto Égica gobernaba l reino de ls godos Bitiza gobernaba l reino de ls suebos.[1]
L'hardança de ls suebos an Pertual
[eiditar | eiditar código-fuonte]Ls suebos adotórun debrebe la lhéngua spano-latina falada nas porbíncias qu'acupórun, pul que poucos bruxedos lhenguísticos restan de la sue persença. Eidantificou-se, inda assi, la palabra "laberca" (ua forma arcaica de "cotobia" an mirandés) cumo deribada de l suebo lawerca. Segundo Dan Stanislawski, l modo de bida de ls pertueses de la region nortenha fui hardado de ls suebos, percipalmente por predomináren las pequeinhas propiadades rurales cuntrariamente a la region sul de Pertual adonde predomina l grande latifúndio. Als suebos tamien se atribui l'antroduçon de l arado quadrado na península [2].
Refréncias
[eiditar | eiditar código-fuonte]- ↑ [Wittiza] quem rex in vita sua in regno participem fecit et eum in Tudensem civitatem avitare precepit, ut pater teneret regnum Gotorum et filius Suevorum. Crónicas Asturianas, Adefonsi Tertii Chronica
- ↑ (an anglés) Stanislawski, Dan. The Individuality of Portugal. The Library Of Iberian Resources Online
