Breekörf

n Breekörf of n biejenkaste is n deur de meens emaakt onderkoemen veur hoenigbiejen.

Veule breekörven wördden vrogger van stro emaakt. t Naodeel hiervan is dat bie t vorthaolen van de hoenig, t oogsten, de körven beschaodigd wördden. Oek bin körven van stro meuilik schone te maken en hebben ze n korte levensduur.

Biejenkaste

Tegenswoordig gebruken imkers houten kasten mit hoeningramen waorin de biejenraoten zitten. Disse ramen hebben standardaofmetingen, zodat de imker ze kan uutwisselen tussen verschillende kasten. t Is daordeur lastig um in de tussentied hoenig te oogsten. t Ouwe raam wörden dan vervangen deur ene mit n stuk kunstmaotig vel van biejenwas waor n hoenigraotpatroon in an-ebröcht is. Dit zal de biejen dan verleien um t veerder uut te bouwen mit der eigen hoenigraot. De biejenkaste mit uutneembaore ramen wördden in 1838 uut-evunnen deur de Poolse priester Jan Dzierzon.

Bie t bepaolen van de aofmetingen van de hoenigramen mut der rekenige mee ehuilen wörden dat biejen openingen, waor ze zelf niet deurheer kunnen, toe zullen maken mit biejenliem (propolis). t Is dus arg belangriek dat der zat ruumte is tussen t raam en de waand van de kaste, aanders zal t uutnemen van n raam n lastig karweitjen wörden.

Biejenstalle

n Antal körven of kasten die onder n aofdak verzameld bin, wörden n biejenstalle eneumd.

Produksie

n Breekörf wördden vrogger altied emaakt deur en spesiale ambachtsman: de breekörfvlechter. Tegenswoordig koemen oek veule breekörven en biejenkasten uut de fabrieksindustrie.

Breekörf as symbool

De breekörf hef oek n symboliese funksie, namelik die van vliet. Vake wörden de breekörf aofebeeld mit n paor biejen. Dit symbool kömp onder aandere binnen de vriemetselarieje veur.

Samen mit n gesel en bisschopsornaot is n breekörf t attribuut van de H. Ambrosius; mit n inktkoker, penne en papier oek van Bernardus van Clairvaux, de stichter van de orde van de sistersiënzers, 1153.