Wikipedia:Inwiesung

Disse Inwiesung is för Lüüd, de geern bi de Wikipedia mitmaken un wat schrieven wüllt, man noch nienich wat mit en Wiki to kriegen hatt hebbt.

Sieden ännern

Wüllt wi anfangen. Gah man to’n Utproberen op de Siet Wikipedia:Speelwisch (opbest röppst de Siet in en tweet Finster op). Op de Siet maakt dat nix, wenn wi wat kaputt maakt. Toeerst mal mööt wi de Siet to’n Bearbeiden opropen. Baven op elke Siet is ene Reeg Knööp. De drüdde heet „Ännern“. Wenn wi dor ropklickt, denn warrt ene Siet opropen, op de du en Finster finnen kannst, in dat de Text vun de Siet steiht. Nu kannst du to den Text wat toschrieven, wat weglaten oder wat ännern. Maak dat mal op Wikipedia:Speelwisch. Denn klickst du beneden ünner dat Finster op den Knoop „Vörschau wiesen“. Glieks över den Knoop in dat Textfeld schöölt wi aver eerst noch kort binnenschrieven, wat wi an de Siet maakt hebbt, denn köönt de annern Brukers dat sehn, ahn dat se allens dörlesen mööt. Nu warrt de Siet wiest, so as se utsehn schall, wenn se spiekert is. Wenn du meenst dat dat good is, wat du ännerst hest, denn geihst du nu op den Knoop „Siet spiekern“. De Siet warrt spiekert un glieks de Artikel wedder wiest, so as he nu utsüht. Dat weer nich stuur. Wo du en heel ne’en Artikel anleggen kannst, dat steiht bi de faken stellten Fragen mit bi.

Utsehn

Dat de Artikel amenn ok good utsüht, mööt wi aver ok Överschriften, Lenken na annere Artikels un so’n Kraam hebben. Wüllt wi us dat mal ankieken.

Fangt wi mit de Lenken an. Dat geiht mit dubbelte eckige Klammern: Wenn du [[Wiki]] schriffst, warrt dorvun Wiki. Twischen de Klammern bruukst du bloot den Naam vun den Artikel schrieven, to den de Lenk gahn schall. Man nich jümmers passt de Artikelnaam in’n Text. Wenn du schriffst: Dor staht twee Bööm un du willst enen Lenk na den Artikel Boom setten, denn geiht dat mit Dor staht twee [[Boom|Bööm]]. Vör den Streek steiht de Naam vun’n Artikel, dor achter de Text, de to sehn wesen schall.

Överschriften maakst du dör Gliekteken. Dat süht so ut:

== Överschrift ==

=== Lüttjere Överschrift ===

==== Noch lüttjere Överschrift ====

Dorvun warrt denn:

Överschrift

Lüttjere Överschrift

Noch lüttjere Överschrift

Fetten Text maakst du mit dree Hoochkommas: '''Fetten Text'''. Fetten Text warrt to’n Bispeel bruukt, wenn de Titel vun de Siet dat eerste Maal in’n Text vörkaamt (op disse Siet to’n Bispeel Inwiesung).

Kursiven Text maakst du mit twee Hoochkommas: ''Kursiven Text''.

Enen Afsatz maakst du eenfach, wenn du ene Reeg utlettst:

En beten Text.

Noch mehr Text in en tweten Afsatz.

Dorvun warrt denn:

En beten Text.

Noch mehr Text in en tweten Afsatz.

Lenken na Sieden, de nich in de Wikipedia liggt, kannst du mit eenfache eckige Klammern maken, de Lenk un de Text, de to sehn is, warrt dör en Leerteken trennt: [http://www.example.com/ Bispeel]. Dorvun warrt: Bispeel. Man denk dor an, dat disse Oort vun Lenken blots ünner de Överschrift Weblenken ganz to’n Sluss vun den Artikel bruukt warrn schöölt un ok bloot denn, wenn de Siet mehr Infos to dat Thema hett as de Artikel.

Diskuschonen

Bi Diskuschonen is dat mooi, wenn de Bidrääg alltied ünnerschreven sünd mit diene Signatur. Dat geiht heel licht, wenn du achter dienen Text eenfach --~~~~ schriffst. Dor warrt denn ganz vun alleen Naam un aktuelle Tiet vun.

Wenn du op annere Fragen Antwoorten giffst, denn is dat hännig, wenn du diene Antwoorten inrückst, so dat de annern Brukers weet, op welken Bidrag du anterst. Dat Inrücken geiht heel licht mit enen Dubbelpunkt an’n Angang vun de Reeg:

Woveel is 2 + 2? --[[Bruker:Weetnix|]] 00:00, 1. Jan 2008 (UTC)
:Fiev. --[[Bruker:Dummbüdel|]] 00:02, 1. Jan 2008 (UTC)
::Gor nich wohr, Dummbüdel. --[[Bruker:Weetalwat|]] 00:04, 1. Jan 2008 (UTC)
:Weetnix, de Antwoort is veer. --[[Bruker:Weetmeistallens|]] 00:06, 1. Jan 2008 (UTC)

Dorvun warrt:

Woveel is 2 + 2? --Weetnix 00:00, 1. Jan 2008 (UTC)

Fiev. --Dummbüdel 00:02, 1. Jan 2008 (UTC)

Gor nich wohr, Dummbüdel. --Weetalwat 00:04, 1. Jan 2008 (UTC)

Weetnix, de Antwoort is veer. --Weetmeistallens 00:06, 1. Jan 2008 (UTC)

Dat schall’t för’n Anfang wesen hebben, de Rest kummt vun alleen, wenn du eerstmal anfungen hest.