CAS-Tall

De CAS-Tall (engl. CAS Registry Number, CAS = Chemical Abstracts Service) is en internatschonalen Standard to’n Beteken vun cheemsch Stoffen. Dat gifft en eendüdige CAS-Tall för jeden bekannten cheemschen Stoff, jede Biosequenz, jede Legeeren, jeed Polymer. Summenformeln, verschedensprakige Trivialnaams un sogor ok IUPAC-Beteken sünd nich jümmer eendüdig un bargt sünners bi Nichchemikers de Gefahr, verwesselt to warrn. Verschedene Isomeren vun en Molekül hebbt ünnerscheedliche CAS-Tallen.

Opbo

En CAS-Tall besteiht jümmer ut dree Tallen, de dör twee Binnstreken scheedt sünd. De eerste Tall kann bit to söven Tiffern ümfaten, de tweete Tall besteiht ut twee Tiffern. De drüdde Tall is en Proovsumm, mit de de Tall kodeert is. Dormit kann de CAS-Tall teemlich licht överprüft warrn, wat de Tall stimmig is. De CAS-Tallen warrt in opstiegen Reeg vergeven, bargt anners aver keen binnere Systematik. Anfang 2007 weern mehr as 30 Millionen Stoffen registreert. Tosamen mit mehr as 58 Millionen Sequenzen, Legeeren un Polymeren sünd dormit mehr as 88 Millionen CAS-Tallen vergeven. Jeden Dag warrt ruchweg 4.000 ne’e Stoffen registreert.

CAS-Tallen warrt siet 1965 vun’n Chemical Abstracts Service – en Institutschoon mit Sitt in Columbus, Ohio, USA, de vun de American Chemical Society verwalt warrt – vergeven. De Bruuk vun de CAS-Registry-Datenbank, de op jede cheemsche Struktur mit Help vun de CAS-Tall verwiest, mutt betahlt warrn.

Proov vun CAS-Tallen

De allgemeene Form vun en CAS-Registreertall is:

Z_{n}\,\ldots \,Z_{4}\,Z_{3}\,-\,Z_{2}\,Z_{1}\,-\,R

Dorbi is $R$ en Proovtall un $Z_{1}\,Z_{2}\,\ldots \,Z_{n}$ en Affolg vun enkelt Tallen

De CAS-Tall is richtig, wenn

\left(\sum _{i=1}^{n}iZ_{i}\right)\,{\bmod {\,}}10=R

wobi mod den Modulus-Operater dorstellt.

Bispeelreken: Ethanol hett de CAS-Tall 64-17-5

CAS-RN-Tiffern	6	4	1	7
Positschoon	4	3	2	1
Bidrag	24	12	2	7	Σ=45

Mit $R=45\mod 10=5$ is de Bedingen inhollen.

Bispelen

Water – CAS: 7732-18-5
Ethanol – CAS: 64-17-5
Acetylsalicylsüür (Wirkstoff vun Aspirin^®) – CAS: 50-78-2

Kiek ok

Weblenken