Marraquèsh
Marraquèsh (en berbèr: Merrakec, en arabi: مراكش, Marrākush, en francés Marrakech), coneguda coma la «Vila Roja», es una vila de Marròc de 1 036 500 abitants (2006) e es la capitala de la region de Marraquèsh-Safi. Se situa al sud-oèst del país, al pè de las montanhas d'Atlàs.
Una origina supausada del seu nom seriá lo berbèr mur (n) akuc, que significariá «tèrra de dieu». La raiç mur s'utiliza ara dins la lenga berbèra mai que mai al femenin amurt. Lo meteis mot mur apareis en Mauritània, mas son interpretacion es pas segura.
A passat temps, Marròc èra conegut coma lo «Reialme de Marraquèsh» pels arabis, persans e europèus. Los noms europèus de Marròc, Marruecos, Maroc, Marokko, etc. son dirèctament derivats del mot berbèr Merrakec o del nom arabi Marrākush.
La vila de Marraquèsh ten lo mercat tradicional (soc) mai grand de Marròc, qu'es tanben un dels màgers d'Africa e del mond, e s'i tròba tanben la famosa plaça de Djemaa el Fna[1] .
Coma fòrça vilas de Magrèb e de l'Orient Mejan, Marraquèsh ten a l'encòp una vila vièlha fortificada (la medina) al costat d'una vila modèrna (Gueliz). Lo quartièr jusieu o mellah se situa dins la vila vièlha o medina. S'i tròba la Sinagòga Salat Al Azama, erigida en 1492. La ciutat es desservida per l'Aeropòrt Internacional de Menara (RAK es lo còde de l'aeropòrt) e una linha ferroviària cap a Casablanca e lo nòrd.