Consciencia

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Consciencia ta e capacidad mental cu ta permiti e individual pa percibi y procesa e mundo pafo, esta pa experencia of tin nocion di su mes paden di su medio ambiente.

Celebro den un bari ta propone, entre otro, cu e contenido di consciencia ta den duda, pero cu existencia ta sigur, paso sin consciencia bo no por duda.

Autoconsciencia ta un experencia di identidad personal, manera autoreflexion. Den otro palabra, e ta un reconosemento di nos propio consciencia, manera un autoreferencia.

E principio central di Marvin Minsky su filosofia ta propone: e spirito ta loke e celebro ta haci

Terminologia

Consciencia no tin un definicion acepta den e mundo di ciencia. Na cuminsamento di siglo 21, hopi hende ta usa e termino "consenshi", "tino", "bin bij" sin problema den idioma diario pa referi na nan propio experencia priva of consciencia. E no ta sinonimo mas cu e termino "mente", cu awor ta encera diferente nificacion y aplicacion. E cambio aki ta debi principalmente na e progreso rapido cu ciencia a haci den comprendemento di funcion di celebro. Por ehempel, e daño cu droga tin riba e celebro of con e cambionan den e actividad di e celnan di e celebro ta coresponde cu cambionan den experencia personal. Apesar di e avance di ciencia, e no a ilumina e naturalesa y origen berdadero di consciencia.

There is nothing that we know more intimately than conscious experience, but there is nothing that is harder to explain.

E profundidad di nos comprendemento ta den nos experencia consciente, sinembargo e ta keda un di e fenomenonan mas dificil pa articula.

—Chalmers (1995)

Etimologia

"Consciencia" ta un prestamo linguistico di e palabra Latin conscientia cu ta nifica "pa ta consciente den sentido moral". Conscientia a desaroya for di conscire ("ta consciente di bon y malo"), asimilacion di com ("cu") y scire ("conocemento") den Latin.

Problema di consciencia

E tarea pa compronde y transforma consciencia pa como un modelo di declaracion ta un esfuerso amplio y diverso, tanto den filosofia como den ciencia. E preguntanan relevante ta categorisa bou di tres rubrica crudo como Kico, Con, y Pakico:

• E prgunta descriptivo: Kico ta consciencia? Por ehempel, Kico ta su caracteristicanan principal y cu ki medio nan por wordo descubri, describi, y modela e mas miho.
• E pregunta splicativo: Con consciencia ta opera? Por ehempel, con consciencia por a desaroya for di entidad of procesonan inconsciente.
• E pregunta funcional: Pakico consciencia ta existi? Por ehempel, si ta asina cu consciencia tin un funcion, kico ta su rol y si e ta e caso cu consciencia tin un efecto causal riba e sistema operativo, ora ey con y pakico?

P-consciencia (phenomenal consciousness) y A-consciencia (access / functional consciousness)

Tipo y grado di consciencia

Ned Block a propone un distincion entre dos tipo di consciencia, esta: fenomenal of P-consciencia (Ingles:phenomenal consciousness) y acceso, funcional, of A-consciencia (Ingles:access consciousness).

P-consciencia ta experencia subhetivo, por ehempel color of zonido. E tipo di experencia aki ta considera como independiente di comportacion y no mester tin influencia riba comportacion. Por ehempel, den filosofia di percepcion ta invistiga na ki grado calidadnan sensorial subhetivo, manera zonido, holo, of color, por existi den un realidad obhetivo. Steven Pinker ta yama P-consciencia tambe, sentience (den Ingles), cu ta nifica pa tin e capacidad pa sinti cual ta opuesto di capacidad pa pensa (rason).

A-consciencia ta capacidad pa percibi y actua ariba contenido di pensamento y observacion of preceptonan. Esaki ta unicamente posibel pa e acceso cu nos tin pa nos consciencia, por ehempel como hende humano. Segun David Chalmers A-consciencia en relacion cu P-consciencia ta relativamente mas facil pa describi, por ehempel den termino di neurociencia. Ademas, e ta discutibel si e P-consciencia y A-consciencia semper ta bay hunto, cu e pregunta si cada uno lo por existi tambe separa.

Grado di consciencia por varia considerabelmente, for di un estado di coma (sero consciencia) pa un estado di alerta (grado halto di consciencia). Sinembargo, teorianan di consciencia mester supera hopi obstaclo. Por ehempel, tin momentonan ora un individuo aparentemente ta inconsciente di informacion nobo (un cas of cara espantoso), y ainda e tin impacto (activacion di emocion; miedo).

Consciencia den filosofia

E problema cu consciencia ta purba di contesta ta un di e preguntanan mas bieu den filosofia di mente. Particularmente, e problema di mente cu curpa: Kiko ta e relacion entre fisico y mente? Den otro palabra, tin un espacio metaforico y misterioso entre e curpa y mente, of subhetivo y obhetivo.

Concepto

Tin varios concepto den filosofia en relacion cu consciencia cu ta hunga un rol significante. Esakinan ta inclui, por ehempel discucion riba problemanan conoci di consciencia, consciencia di animal, consciencia artificial, localisacion di consciencia, consciencia como atributo, qualia, y e pregunta di, si e mundo ta wordo percibi direct of indirect.

Problema di consciencia

• E problema mente–curpa ta e tema central paden di filosofia di mente, cu ta propone cu aparentemente tin un interaccion inexplicabel meymey di substancia fisico (materia; curpa) y no fisico (inmateria; mento of spirito). Platon ta e prome filosofo occidental pa a anda cu e problema aki. Na siglo 17, René Descartes a amplia y revitalisa e concepto. E problema mente–curpa ta considera como un problema dificil di consciencia.

• E problema dificil di consciencia di David Chalmers a clarifica cu hopi problema den consciencia por wordo categorisa den dos typo di problema: simpel y dificil. E problemanan simpel ta esnan describi den termino di neurociencia. Esakinan ta inclui fenomenonan cu ta asocia cu consciencia, por ehempel, e mechanismo di atencion, control di comportacion, of ritmo circadiano (ciclo di soño y spierto). Na contraste, e asunto cu realmente ta un desafio ta experencia: compronde con ta sinti pa ta un organismo (Con e ta pa ta un raton di anochi?), pa ta den un estado mental specifico (halucinacion), of pa experencia e sensacion di blauw profundo (cuarto di Mary). Specificamente, e problema dificil ta investiga con e procesonan fisico den e celebro ta duna lugar na experencia subhetivo. E existencia di e problema dificil ta controversial y ta wordo cuestiona pa alguna filosofo, manera Daniel Dennett, Stanislas Dehaene.
• E problema di otro mente, na mita di siglo 20, a bira un punto di discucion den epistemologia: Con mi sa (o con mi por hustifica e creencia) cu otro sernan ta existi cu tin pensamento, sintimento, y otro atributo mental? E posibilidad di un asina yama zombie filosofico tin biaha ta wordo uza pa enfatisa e problema di otro mente.

E "cora" di cora ta un ehempel comun di quale.

Subhetividad y qualia

Qualia ta e calidad distincto of caracter fenomenal di un experencia. E ta principalmente trata di e forma cu un experencia subhetivamente ta presenta su mes na un individuo. E bista di e shelo blauw-ros durante baha di solo of sensacion di bula den laman friu ta un quale. Varios filosofo ta nenga of enfatisa e existencia di sierto propiedad di qualia, pues e naturalesa y existencia di qualia ta controversial. Den su ensayo Quining qualia, Daniel Dennett ta convenci cu no tin propiedad manera qualia.

Movemento

E solucion pa e problema mente–curpa, for di perspective di filosofia, por wordo dividi mas of menos den dos teoria:

1. Teoria monista ta afirma cu tin solamente un sorto di "cos" y
2. teoria dualista ta propone dos typo di "cos" na mundo.

Dualismo

Cogito, ergo sum

Mi ta pensa, p'esei mi ta existi

—René Descartes, Principia philosophiae (1656)

René Descartes a describi e curpa como un mashin, sinembargo, e la yega na e conclucion cu e mente, spirito of alma mester ta un entidad separa. E conexion entre e dos substancianan aki, Descartes a ser atribui na e glandula pineal, considera como curason di e alma. E teoria ki ta conoci como dualismo Cartesiano. Dualismo Cartesiano ta historicamente di importancia pa a surgimento di e problema di mente y curpa, ademas dualismo Cartesiano ta un typo di dualismo mente–curpa. E termino dualismo mente–curpa ta nifica cualke teoria cu ta sugeri interaccion causal entre dos substancia fundamentalmente diferente: material y mental (inmaterial). Material no por pensa, y e substancia mental no por extende su mes den e espacio fisico. E concepto di dualismo ta compatibel cu mayoria ideologianen teologico di un alma inmortal.

Segun Descartes, e celebro fisico tabata funciona dor di fluho di spirito di animalnan dor di su cavidadnan. E alma inmaterial tabata conecta cu e curpa y e celebro pa medio di e glandula pineal (H) cu ta situa na liña di mei.

Na 1949 e filosofo Britanico Gilbert Ryle a critica dualismo como "e dogma di spirito den e mashin". Ryle a argumenta cu e idea di un alma ta un eror den categorisacion y den uso di idioma. Na su opinion hende tabata papia di mente y curpa como un fenomeno total diferente, manera cu alma tabata algo extra of separabel di e curpa. Den opinionnan contemporaneo, e mente ta ser mira como e funcion cu ta ehecuta y no come e ser.

Den siglo 20, a hasi dos intento notable pa sostene dualismo. Karl Popper y neurofisiologico John Eccless a propone interacionismo dualismo na añanan 1970. Popper y Eccless a argumenta cu e celebro por wordo influencia simplemente dor di pensamento of e ser su sentimento. Na 2004, Benjamin Libet a propone un teoria cu e la yama conscious mental field (CMF) of "veld consciente mental" pa splica cu CMF ta e mediadior entre e parti mental cu ta surgi for di e celebro fisico. E dos ideanan principal cu a propone e teoria di CMF ta: (1) e fenomeno di unidad y continuacion di e experencia subhetivo y (2) e fenomeno cu e funcion di e mente consciente ta parse di tin influencia riba e actividad di un cel di nervio.

Un ehempel adecua pa e idea di "unidad y continuacion di e experiencia subhetivo" ta e fenomeno di lesa un buki. Mientras bo ta lesando un buki e mente ta surpasa varios pensamentonan, emocionan, y perspectivanan. Despues di a bira e pagina, e mente ta sigui navega e palabranan, sin esfuerso, ta compronde e lenguahe, ta construi un imagen mental pa continua e fluho di e storia. E mesclamento suave di diferente aspectonan di consciencia ta resulta den un fluho di continuacion y interaccion di experencia. E concepto di unidad di experencia subhetivo ta un tema central na e mente cognitivo di un ser humano. E mesun ehempel ta conta pa cu e "funcion di e mente consciencte…ariba e actividad di un cel di nervio". Ora e movecion di un wowo (P1) pasa ariba un palabra manera "flamingo", e mente ta interpreta y procesa (M1) e entrada di informacion for di e wowo, despues di a cumpli e procesamento mental e wowo por sigui move pa e sigiente palabra (P2).

Cuater variedad di interaccion dualista di causa, pa tene simpel, unicamente e prome dosnan ta di importancia. E flecha ta indica e direccion di causa. E estado mental (M) y fisico (P) ta wordo indica cu color cora i blauw, respectivamente.

E doctrina di epifenomenalismo ta e idea cu eventonan fisico tin causa pa eventonan mental, pero eventonan mental no tin efecto pa cu e eventonan fisico. Den otro palabra, emocion, consciencia, of pensamento ta un producto secundario of un epifenomeno di proceso fisico di e celebro. E idea ki ta atribui na Julien Offray de La Mettrie den su obra L'homme machine (Hende ta un mashin), a lanta controversia den Francia di siglo diesocho. La Mettrie a argumenta cu curpa humano, mescos cu curpa animal ta funciona como un mashin inteligente, y e diferente estado di alma ta conecta cu e curpa. Mientras cu na prome instante su ideologianan tabata posiciona na centro di epifenomenalismo, La Mettrie despues a leun den direccion di materialismo. E la sugeri cu e abilidad di alma ta inseperabel for di e organisacion specifico di e celebro y curpa.

Epifenomenalismo ta un forma di dualismo di propiedad. Por ehempel, un substancia fisico manera e celebro tin dos propiedad, e aspecto fisico (structura, masa, o funcion) y aspecto mental (experencia subhetivo manera emocion).

Un automata den forma di un pato traha pa Jacques de Vaucanson. E pato tabata parse mane e por a come y digeri su cuminda.

Thomas Henry Huxley, un epifenomenalista, a reconoce consciencia pero a nenga su influencia causal. E la compara animal, incluyendo hende, como si fuera nan ta un "automata cu ta consiente", sugeriendo cu consciencia no tin ningun impacto ariba e mecanismo di e celebro y curpa. Por ehempel, den e mesun forma cu un sombra no tin efecto ariba esun cu ta duna e sombra.

Ilustracion di Theater Cartisiano. Un persona chikito, sinta na un cine den un cabes humano, observando y tende tur loke e ser humano ta experenciando.

Na 1991, Daniel Dennett a introduci e termino "materialismo Cartesiano", pa describi e posicion cu hende ta pretende di ta materialista pero basa ariba e concepto di dualismo. Particularmente, e idea cu tin un momento y luga identificabel unda tur cos ta bin hunto den e celebro y "consciencia ta eherce su mes". Dennett tambe ta comparti e bista di Ryle cu mester pone atencion ariba e lenguahe cu ta usa pa pensa y splika e conceptonan ki, paso e palabranan cu nos ta usa ta influencia e manera con nos ta pensa, por ehempel, "ta drenta consenshi". Mesora esaki pasa, e idea di "Theater Cartesiano" ta bin halto (un version nobo di Ryle su spirito).

Monismo

Teoria monista ta consisti en general for di idealismo y materialismo. Un idealista ta pensa cu e mundo mental ta fundamental. Den otro palabra, e mente ta hunga un rol central den determina y forma kiko nos ta considera como realidad. Por ehempel, considera e color cora. Den un perspectiva idealista, e color cora di un aplo no ta un calidad inherente di aplo mes, pero como un resultado di con e mente ta percibi y experencia cierto largura di onda di luz. George Berkley, por ehempel, a reemplasa materia cu sensacion di mente.

Opuesto di idealismo, tin materialismo, cu ta afirma cu e universo ta consisti solamente di materia y energia, pues materialismo no ta laga ningun luga pa consciencia of mente inmaterial interveni. Materialismo ta inclui teoria di identidad, cu ta sugeri cu e estado mental ta mescos cu e estado celebral, y teoria di funcionalismo, cu ta propone cu e estado mental ta ekivalente na e estado funcional. Imagina, por ehempel, e estado di felicidad cu bo ta den ora ba ricibi un regalo cu bo no a spera. Segun e teoria di identidad, e estado di felicidad ta identico cu procesonan of patrono di actividad neural asocia cu e emocion di felicidad, pero segun e teoria di funcionalismo, e funcion di felicidad ta identifica pa su rol den promove bienestar y conexion social.

E teorianan paden di e kader di materialismo tin dificultad di splika experencia subhetivo. En particular, con sintimento ta causa e exprecion fisico di emocion, con sintimento ta wordo reduci na materia, y cu materialismo tin dificultad di hustifica e manera cu consenshi ta sinti.

William James a propone un perspectiva conosi como "monismo neutral" como un alernativa na materialismo, idealismo, y dualismo. Monismo neutral ta asumi cu e mundo ta consisti di un solo tipo di substancia cu no por wordo categorisa como puramente mental of fisico. James a sugeri cu e substancia fundamental aki ta "experencia puro", cual ta e experencia sensorial sin filtro.

E concepto di panpsicismo ta afirma cu consciencia ta un aspecto fundamental di tur cos. E ta lanta preguntanan desafiando. Por ehempel, si ta considera cu un piedera ta consciente, e consciencia aki ta extende te na su moleculnan individual? E idea di atribui atributonan mental, manera consciencia, na entidadnan simpel manera electronan ta un reto conceptualmente significante. Apesar di e dificultad nan aki, algun teoria contemporaneo di consciencia, manera Integrated Information Theory (IIT, Teoria di Informacion Integra) ta ser mira como formanan di panpsicismo.

Lista di fuente

• Blackmore, S.; Troscianko, E.T. (2018). Consciousness: An introduction [Consciencia: Un introducion] (3 ed.). Routledge. https://www.routledge.com/Consciousness-An-Introduction/Blackmore-Troscianko/p/book/9781138801318. 
• Dietrich, Arne (2007). Introduction to consciousness: neuroscience cognitive science, and philosophy [Introducion na conciencia: neurociencia ciencia cognitivo y filosofia]. Palgrave Macmillen. ISBN 9781403994899. 
• https://press.rebus.community/intro-to-phil-of-mind/front-matter/introduction/
• https://positivepsychology.com/consciousness-psychology/
• https://iep.utm.edu/dualism-and-mind/

Referencia

Mira tambe e kategoria Consciousness di Wikimedia Commons pa mas dato mediatiko tokante di e tema aki.