Silvio Berlusconi

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Silvio Berlusconi (Milan, 29 dë stèmber 1939 - 12 'd giuni 2023), sovens ciamà Il Cavaliere përchè a l'é stait nominà Cavajer dël Travaj dal Pressident ëd la Repùblica Giovanni Leone ant ël 1977, a l'é stait n'imprenditor e òm polìtich italian.

A l'ha tacà a travajé ant l'edilissia e apress ant l'industria dla television comersial, creand la Fininvest dël 1975 e Mediaset dël 1993. Ant ël midem ann a l'é intra an polìtica e a l'ha fondà ël partì Forza Italia, an strenzend aleansa con la Lega Nord d'Umberto Bossi e con Alleanza Nazionale ëd Gianfranco Fini.

Da antlora a l'é stait quatr vire Pressident dël Consèj, ant j'agn 1994, 2001-2005, 2005-2006 e 2008-2011. Con 3340 di ëd goern a l'é ël polìtich ch'a l'é stait pi a longh an càrica tanme Pressident dël Consèj, superà prima dla Repùblica mach da Giovanni Giolitti e da Benito Mussolini.

Sò Govern dël 2001, durà sinch agn, a l'é stait ël pi longh ëd la stòria republican-a. A l'é l’uni leader mondial ch'a l'ha pressiedù tre vire ël G8 coma president dël pais ch'a lo ospitava. Ant ël 2008 sò partì a l'ha cambià nòm e a l'é vnù Popolo della Libertà (PDL), ma ant ël 2013 Angelino Alfano a l'é dëstacasse an fondand l'NCD e chiel a l'ha rifondà Forza Italia.

A l'ha subì pì che vint process, con l'acusa d'indussion a la prostitussion, com ant ël cas Ruby, o për frauda fiscal com ant ël process Mediaset, dont al prim avost 2013 a l'ha arseivù na condana a quatr ani ëd reclusion e a doi d'astinensa dai pùblich ufissi. Ai 27 novèmber 2013 ël Senat a l'ha votà soa decadensa da Senator. A l'ha scontà soa pen-a ai servissi sossiaj.

A l'era amis con Muhammar Gheddafi, ël ditator ëd la Libia ch'a l'han massà ant la guèra sivil dël 2011, e con Vladimir Putin, ch'a l'ha già anvità an soa vila.

A vivia an Lombardìa, a Arcore. A l'era Pressident dël Milan e sò fieul Piersilvio a l'é Pressident ëd Mediaset. Dël 2009 Forbes a l'ha definilo col qu’a fa 12, òm pi potent dël mond. Dël 2015, con 7,6 miliard d'euro a l'è stàit ël seto òm pì rich d'Italia e col ch'a fà 179 ant ël mond, tavòta second Forbes.