Papa
|
Questa pagina è scritta en puter. |
Il papa es il cho da la baselgia catolica romauna ed il schef mundiel dal stedi dal Vatican. In medem möd es papa u bap sench sieu titel religius ed uffiziel. Impü es il papa l'uvas-ch da Roma.
Istorgia
Origen
Seguond la cretta catolica deriva l'uffizi papel da Simon Petrus scu da quel apostel chi ho artschvieu da Gesu svess las clevs da tschêl, nempe per lier e schlier pchos. Numno vain in quist connex il lö biblic aint il evangeli seguond Matteus 16,18-19: "(18) Perque di eau [Gesu] a te: Tü est Petrus; e sün quist spelm vögl eau fabricher mia baselgia! Üngün inimih nu saro bun da la ruiner, niauncha la mort bricha. (19) A te vögl eau der las clevs per il nouv muond da Dieu. Que cha tü vainst a declarer impegnativ cò sün terra, que saro impegnativ eir davaunt Dieu" (traducziun da Gion Gaudenz, Il Nouv Testamaint. La buna nouva, 2004).
L'uscheditta successiun apostolica - üna chadagna da consecraziuns sainz'interrupziun - dess garantir cha'l Spiert Sench resta sur da tuots temps davent collio cun l'ordinaziun dals papas.
Ils reformatuors dal 16evel tschientiner haun cumbattieu cunter la pussaunza in lur ögls anti-divina ed usurpeda dals papas. In seguit s'haun furmedas baselgias protestantas.
Varia
La Guardgia svizra papela pissera per la sgürezza dal papa.
Litteratura
- Georg Denzler: Das Papsttum (= Il papissem). Chesa editura C.H. Beck, München 1997, ISBN 3-406-41865-1.