Comunidade Valenciana

Artìculu in LSC

Posidura de sa Comunidade Valenciana in s'Ispagna

Bandera de sa Comunidade Valenciana

Sa Comunidade Valenciana (uffitzialmente in valentzianu Comunitat Valenciana; in castillianu Comunidad Valenciana) est una de is deghesette comunidades autònomas de s'Ispagna e una regione istòrica de sa penìsula Ibèrica, nodìa fintzas che Paisu Valencianu (País valencià).

Su territòriu benit a èssere difatis, foras pro carchi diferèntzias, su de s'antigu rènniu de Valencia, fundadu in su 1239 de Jacu I d'Aragona. Su cabulogu est Valencia, is limbas uffitziales sunt su cadalanu in sa bariante locale, narada valencianu, e su castillianu.

Is istitutziones de autoguvernu costituint sa Generalidade Valenciana (Generalitat Valenciana), chi est formada de su guvernu (Consell) e su Parlementu Valencianu (Corts). Cuformamente a s'Istatutu d'autònomia bàlidu de su 2006, est reconnota che « natzione istòrica ».

Sa Comunidade valenciana tenet istèrrida de 23 255 km2 (a cara de sa Lombardia) e contat unos 4 807 000 bividores, su 10,75% de sa populatzione de totu s'Ispagna. Valencia, su cabulogu, cun prus de 800.000 bividores e un'àrea urbana de 1,7 milliones de residentes est sa bidda prus manna, sighint Alicante e Elche. Sa comunidade est partzida in tres provìntzias: Valencia, Alicante, Castellón.

S'agatat ins s'estu de s'Ispagna, in sa costera mediterrània e allàcanat cun Aragona e Catalugna in su norti, cun Castìllia-La Mancha in s'uestu, e cun sa comunidade autònoma de Murcia in su sud.

Sa limba valenciana est faeddada de unas 2,3 milliones de pessones, duncas una metade de sa populatzione totale, s'àtera metade faeddat su castillianu.

Su rèdditu mèdiu est a cara de is regiones italianas de Liguria e Piemonte.