Otto Valstad

Otto Valstad var fødd i Asker. Han vart utdanna ved Asker seminar og var lærar i Asker 1884–1887, deretter i Tønsberg 1887–1898. Han debuterte på Høstutstillingen i 1890 og studerte ved Académie Julian i Paris og Den Kongelige Tegneskole i København. Valstad var radikal og sat ei tid i Asker herredsstyre. Han var oppteken av sosialt arbeid for barn. Otto Valstad var gift med Tilla Valstad. Ho gav økonomisk hjelp til mannen til å realisere kunstnardraumen.

I restaureringa av Asker kyrkje var han aktivt med. Han arbeidde elles med landskapsmåleri og portrett- og sjangermåleri. Valstad er innkjøpt av Nasjonalmuseet med eit portrett av Lina Brun frå 1901. Han illustrerte og skreiv barnebøker i eit dialektfarga språk. Eit døme er den sosialrealistiske Torvills saga (1939).

Valstad illustrerte bøker som Rasmus Lølands Kvitebjørnen (1906), Arne Garborgs Kolbotnbrev (1911) og kona Tilla Valstad si gjendikting av Æsops fabler (1918). Valstad var æresmedlem i Tegnerforbundet.

Ekteparet Valstad og Garborg og Løland var naboar og stod sentralt i Askerkretsen. Heimen og den vakre hagen deira på Øvre Valstad er eit minnesmerke over han og kona Tilla Valstad. Samlinga med gamle hus, antikvitetar og kunst testamenterte dei til Asker Museum.

• Otto Valstad i Norsk biografisk leksikon
• Otto Valstad i Norsk kunstnerleksikon
• Asker Museum – Valstads samlinger

• Digitaliserte publikasjonar av Otto Valstad hos Nasjonalbiblioteket
• DigitaltMuseum: Otto Valstads måleri og teikningar i Akershusbasens samling
• DigitaltMuseum: Foto av Otto og Tilla Valstad