Myrra er harpiks som kjem frå borken til ulike artar av balsamtre, og som størknar til ein gulbrun til raudbrun masse. Myrra er ein av dei eldste medisinane som er kjent frå det gamle Egypt, og er ein av gåvene, som i fylgje kristen tradisjon, vart skjenkt den nyfødde Jesus av dei heilage tre kongar.
myrra
Utvinning
Myrra blir utvunne frå ulike balsamtreartar i slekta Commiphora i balsamfamilien. Trea og buskane som skil ut myrra veks i tropiske og subtropiske delar av Afrika, Asia og Sør-Amerika. Plantene er tørketolerante, kan bli opp til fem meter høge, og fleire av artane har kraftige tornar.
Myrra blir danna når harpiks blir sveitta ut av borken til desse trea, og seinare herdnar. Dette kan skje naturleg ved at borken sprekk, eller ved at ein lagar eit snitt i borken.
Innhald
Når myrra siv ut frå borken til treet, stivnar han og dannar gulbrune til rødbrune korn eller klumpar som inneheld gummi, harpiks og eterisk olje.
Bruk
Myrra har vore nytta i tradisjonell medisin på fleire kontinent. I dag blir myrra i tillegg nytta i kosmetikk og i farmasøytiske produkt.
Tradisjonell kinesisk medisin
I Kina har myrra vore nytta sidan Tang-dynastiet, og Kina er i dag det landet i verda som importerer mest myrra. Det meste av importen går til tradisjonell kinesisk medisinsk bruk. Myrra vert i kinesisk medisin mellom anna nytta til smertelindring, til hevingar, leddsjukdommar, hudinfeksjonar og sår.
Det gamle Egypt
I det gamle Egypt har myrra mellom anna blitt brukt i behandling av sår, til lindring av smerter, til parasittiske infeksjonar og tarmsjukdommar. Det har og vore nytta i balsamering.
Les meir i Store norske leksikon
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.