tung masse – Store norske leksikon

Tung masse er det som gjer at eit objekt har tyngde, altså at det blir påverka av tyngdekrefter. Massen som opptrer i Newtons gravitasjonslov er tung masse. Den tunge massen og den treige massen til eit objekt er alltid like stor.

Faktaboks

Også kjend som: graviterande masse

Det er tung masse som gjer at eit objekt kan verke på andre objekt med tyngdekrefter. Ei bok får tyngde i tyngdefeltet frå Jorda fordi ho har tung masse. Både Jorda og boka har tung masse, som gjer at dei verkar på kvarandre med tyngdekrefter.

Tung masse og treig masse

Den tunge og treige massen til eit objekt er alltid den same. Dette er eit empirisk resultat, altså eit resultat som kjem frå målingar, som er sentralt i ekvivalensprinsippet i den generelle relativitetsteorien.

Ekvivalensprinsippet seier at det ikkje er mogleg lokalt å avgjera med målingar om eit objekt er i eit akselerert system eller i eit tyngdefelt. Ekvivalensprinsippet gjer det altså naudsynt at tung og treig masse er like, fordi det sikrar at alle objekt opplever same akselerasjon i eit tyngdefelt.

Les mer i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

Fagansvarleg for Mekanikk

Maria Vetleseter Bøe

Førsteamanuensis i fysikkdidaktikk, Universitetet i Oslo