އެޕަލް ކުންފުނީގެ އެންމެ ބޮޑު އެއްމާކެޓް ކަމުގައިވާ ޗައިނާގައި އެޕަލްގެ އައިފޯނު ވިޔަފާރި ނުވަ ޕަސެންޓު ދަށަށް ހިނގައްޖެއެވެ.
އައިޑީސީގެ ރިސާޗް ރިޕޯޓަކުން ދައްކާގޮތުގައި މިއަހަރުގެ ފުރަތަމަ ކުއާޓަރގައި އެޕަލްގެ ސްމާޓްފޯނު ވިއްކުން ޗައިނާގައި ނުވަ ޕަސެންޓު ދަށަށް ގޮސްފައިވާއިރު، މިއީ ސްމާޓްފޯނު އުފައްދާ ބޮޑެތި ކުންފުނިތަކުގެ ތެރެއިން ވިޔަފާރި ދަށަށް ދިޔަ ހަމައެކަނި ކުންފުންޏެވެ.
ޗައިނާގެ ސްމާޓްފޯނު މާކެޓުގައި ފަސްވަނައަށް އޮތް އެޕަލްގެ ވިއްކުން ވަނީ 9.8 މިލިއަން ފޯނަށް ދަށަށް ގޮސްފައެވެ. މިއާއެކު އެޕަލްގެ މާކެޓް ޝެއަރ ވަނީ 13.7 އިންސައްތައަށް ދަށަށް ގޮސްފައެވެ. މިއީ ވިދިވިދިގެން ހަތް ކުއާޓަރުގައި އެޕަލްގެ ވިއްކުން ދަށަށް ދިޔަ ފަހަރެވެ.
މިއާ ޚިލާފަށް މާކެޓް ލީޑަރު ޝިއޯމީގެ ވިއްކުން ވަނީ 40 އިންސައްތަ އިތުރުވެ 13.3 މިލިއަން ފޯނަށް އަރާފައެވެ. މުޅި އިންޑަސްޓްރީގެ ވިއްކުން ވަނީ 3.3 އިންސައްތަ އިތުރުވެފައެވެ.
އައިޑީސީގެ އެނަލިސްޓް ވިލް ވޯންގް ވިދާޅުވި ގޮތުގައި އެޕަލްގެ އަގުބޮޑު ފޯނުތަކަށް ޖެނުއަރީ މަހު ސަރުކާރުން ތަޢާރަފުކުރި ސަބްސިޑީގެ ފައިދާ ނުލިބުމުގެ ސަބަބުން އެޕަލްގެ ވިއްކުން ދަށަށް ގޮސްފައިވެއެވެ. މި ސަބްސިޑީގެ ދަށުން 6،000 ޔުއާން (820 ޑޮލަރު) އަށްވުރެ ދަށް އަގުގެ ސްމާޓްފޯނުތަކަށް 15 އިންސައްތައިގެ ރިފަންޑެއް ކަސްޓަމަރުންނަށް ލިބެއެވެ.
ޓެކް ވިޔަފާރީގެ ރިޕޯޓްތައް ބުނާގޮތުގައި މި ނަތީޖާތަކުން ދައްކައިދެނީ ޗައިނާގެ ސްމާޓްފޯނު މާކެޓުގައި އެޕަލްއަށް ކުރިމަތިވެފައިވާ ގޮންޖެހުންތަކާއި، އެހެން ބްރޭންޑްތަކުގެ ވާދަވެރިކަން އިތުރުވަމުންދާ މިންވަރެވެ.
ޗައިނާއަކީ ދުނިޔޭގެ އެންމެ ބޮޑު ސްމާޓްފޯނު މާކެޓެވެ. ފާއިތުވި އަހަރުތަކުގައި އެޕަލްއަކީ މި މާކެޓުގައި ވަރަށް މުހިންމު ދައުރެއް އަދާކުރަމުން އައި ކުންފުންޏެކެވެ. ނަމަވެސް ފަހަކަށް އައިސް ޗައިނާގެ ލޯކަލް ބްރޭންޑްތަކުގެ ވާދަވެރިކަން އިތުރުވެ، އެޕަލްގެ މާކެޓް ދިއުމުގެ ޝެއާ ޓްރެންޑެއް ފެންނަމުންދެއެވެ.
މީގެ އިތުރުން، ޗައިނާ- އެމެރިކާ ވިޔަފާރީގެ ގުޅުމަށް އައި ބަދަލުތަކާއި، ޗައިނާގެ އިޤްތިދީ ދަތިތަކުގެ ސަބަބުން ވެސް އެޕަލްގެ ވިޔަފާރިއަށް އަސަރުކޮށްފައިވެއެވެ.
މި ހާލަތުގައި، އެޕަލްއިން ޗައިނާގެ މާކެޓުގައި އަލުން ކުރިއެރުން ހޯދުމަށް އައު ސްޓްރެޓެޖީތަކެއް ތަޢާރަފުކުރަން ޖެހިފައިވާ ކަމަށް އެނަލިސްޓުން ދެކެއެވެ.