Balaših

Balaših
Балашиха

Lidnanznam	Flag
Valdkund	Venäma
Eläjiden lugu (2020-01-01)	507,366 ristitud
Pind	62,8 km²
Pämez'	Sergei Jurov (heinku 2017—)
Telefonkod	+7−495-xxx-xx-xx. +7−498-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Balaših (ven.: Балаши́ха) om Venäman lidn da raudtesol'm Moskvan agjan keskuzpalan päivnouzmas. Se om Moskvan päivnouzmaine ezilidn, agjan kaikiš suremb lidn eläjiden lugun mödhe, Balašihan lidnümbrikon (edel 2006. vot — rajonan) administrativine keskuz.

Istorii

Usadibad oliba olmas nügüdläižen lidnan territorijal 16. voz'sadaspäi.

Eländpunktan aluz om pandud vl 1830 kuti Balašihan vatken manufaktur (mellic Ploših-külänno, möhemba Bloših). Sai lidnan statusad vl 1939. Lidn lainzi lähižid eländpunktoid aigan mändes, sidä kesken vll 2003−2004. Mülütihe Železnodorožnii-lidnad-lidnümbrikod Balašihaze vn 2015 vilukus.

Balaših šingotase mašinansauvomižen tegimil (lendimiden palad, libutimed i manipulätorad, mašiništ il'man jagundan täht, metalližed hijamad), sauvondmaterialiden pästandal (puižed pertid, putegesed, raudbetontegesed, sauvondmujud i krepindad), tehmižgazoiden edheotandoil, sömtegimištol (leib i leibproduktad, likörvintegim), pakuitesen tegimil (transportine plastikpakuitez, konteinerad radioaktivižiden jändusiden täht). Kaks' tedoinstitutad ratas lidnas: lämoipalovastal'žen kaičendan i deminiruindan sistemiden.

Geografijan andmused

Lidnümbrikon kart (2015)

Lidn sijadase Pehork-jogen (ven.: Пехо́рка 42 km pitte, Moskvan hura ližajogi) da sen ližajogiden randoil, 150 m ü.m.t. keskmäižel korktusel. Mahuz om letkesine süvüdel. Om saudud uitoid Pehork-jogel usadiboiden aigoišpäi. Lidnümbrik röunatab Moskvanke (Moskvan rengazavtotenke) päivlaskmas. Toižed lähembaižed lidnad oma Ščolkovo 5..10 km pohjoižhe, Vanh Kupavn 5 km päivnouzmha, Elektrougli 2..6 km suvipäivnouzmha, Lüberci 2..5 km suvhe, Reutov ani suvipäivlaskmha. Kučinon rujopoligon radoi kar'jeran sijas vll 1964−2017, sen rekul'tivacii vedase. Kaks' magistrališt kivivoinvent ratas lidnan territorijal: «Jaroslavl' — Moskv» i «Räzan' — Moskv». Rahvahaline «Hirbin Sar'»-puišt levitase ani lodeheze lidnaspäi.

Balaših-raudtestancii radab lidnas sarakol Reutovaspäi lopstansijaks vspäi 1912. Toine järed stancii om Železnodorožnai (vll 1861−1939 Obiralovk), matkad elektrojonusel Moskvan Kurskan päraudtestancijhasai om 24 km.

Žilo i 11 küläd mülüdas lidnümbrikho Balašihan ližaks. Lidnümbrikon pind om 244,18 km².

Eläjad

Vl 1939 lidnan ristitišt oli 28 766 eläjad, vl 1959 — 57 600 eläjad. Vn 2010 Venäman rahvahanlugemižen mödhe lidnan eläjiden lugu oli 215 494 ristutud, lidnümbrikon — 225 381 ristitud. Kaikiš suremb ristitišt om nügüd'. Kaik 518 788 ristitud elädas lidnümbrikos vl 2020. Ortodoksižen hristanuskondan kaks'kümne viž jumalanpertid i koume časounäd oma olmas lidnas.

Rahvahad (2010): venälaižed — 92,4%, ukrainalaižed — 2,1%, armenijalaižed — 1,0%, toižed rahvahad — 4,5%.

Professionaližen opendusen aluzkundad oma Balašihan tehnikum, Gidrometeorologijan tehnikum, Venäman agrarine stacionaratoi universitet, Venäman sodaraketakademii.

Galerei

• 
  Äifunkcionaline keskuz
• 
  Ph. Mikoi-arhangelan jumalanpert'
  (vn 2009 nägu)
• 
  Bizneskeskuz
• 
  «Lüksor»-kinoteatr «East Gate»-adivpertinno
• 
  Železnodorožnai-päraudtestancii
  (2015)

Irdkosketused

• Lidnümbrikon Ezitajiden Nevondkundan sait (balashiha-sovet.ru). (ven.)
• Lidnümbrikon Administracijan oficialine sait (balashiha.ru). (ven.)
• Lidnan informacine sait (vbalashihe.ru). (ven.)