roed

Walon (Rifondou)

Etimolodjeye

Tayon-bodje latén « rigidus » (minme sinse).

Addjectif

	singulî	pluriyal
omrin	roed	roeds
femrin atribut	roede	roedes
femrin epitete (todi padvant)	roede	roedès

roed omrin todi padvant

1. ki bodje målåjheymint.
   • Djel voe ployî, baltant sol djambe,
     Li tiesse tote blanke, les rins tot roeds. — Martin Lejeune, “Œuvres lyriques du poète Martin Lejeune” p.186, « Lu cane d’a grand-pêre» (fråze rifondowe).
   • Tot timpe å matén, tot roeds et tot edjalés d’ froed, dj’ alans boere do bén tchôd cafè avou des pwins francès. — Émile Pècheur (fråze rifondowe).
2. ki monte foirt.
   • L’ escalî est putoit roed et les montêyes sont on pô stroetes. — Arthur Masson (fråze rifondowe).
3. foirt.
   • On shofla, c’ est on roed shoflaedje do vint.
4. foirt et deur (sovint tot fjhant des djeus d’ mots, e tuzant å vé).
   • Boune anêye ; k’ ele soeye doûce, roede et longue, po poleur end aler disk’ å dbout.
   • 1998 : Dji vos l’ sohaite longue et roede. — Yves Gourdin (fråze rifondowe).
5. djinné e societé, ki n’ bodje nén, ki n’ reye nén.
6. (imådjreçmint) vî et ritche.
   • C’ est ki, tot divnant pus roed, l’ ome divént pus raezoe. — Nicolas Defrecheux (fråze rifondowe).

Ratourneures

1. on roed ramon : Loukîz a : « ramon ».
2. roed come on mantche a ramon, ossu roed k’ on mantche di schoupe, pus roed k’ on piket, ossu roed k’ ene beye : tot roed.
   • Mes djambes ni s’ volént radressî ; elle estént ossu roedes ki des mantches di schoupe. — Guillaume Smal (fråze rifondowe).
3. on-z est roed divant d’ esse prince: rl a: rwè. (!!! a-z aveuri)
4. flayî å roed bresse : avou bråmint del foice.
   • El bamboula flaye å roed bresse so ene grosse-caisse. — Félicien Barry (fråze rifondowe).
5. di s’ pus roed : di tote si pouxhe.
   • Cwand s' deure cougnêye
     Flaxhe di s' pus roed,
     Åbes et bohêyes
     Ni fèt nou pleu !
     — Louis Lagauche, "Les belès-eures" (1928), p. 116 (fråze rifondowe).
6. si tini roed

Mots d' aplcaedje ^(?)

• roetabale
• roedak

Mots vijhéns

(ki monte foirt)

• rwesse

Ortografeyes

Divant 1900 :

• reû : E203 ^(lére)
• reu : E177, E212 ^(lére)

Après 1900, foû rfondou (Feller, Feller ricandjî, nén Feller) :

• rœd : C8
• r(i)wè : C9
• reûd, reûde : E165
• reû : E1

E rfondou walon :

• roed, roede : R10 ^(lére), R13

Ratournaedjes

ki bodje målåjheymint

• Francès : raide ^(fr), ankylosé ^(fr), engourdi ^(fr)

ki monte foirt

• Francès : raide ^(fr), abrupt ^(fr), escarpé ^(fr)

foirt

• Francès : fort ^(fr), puissant ^(fr)

foirt et deur

• Francès : vigoureux ^(fr), robuste ^(fr)

djinné e societé

• Francès : raide ^(fr), guindé ^(fr), rigide ^(fr)

vî

• Francès : vieux ^(fr)

flayî å roed bresse

• Francès : vigoureusement ^(fr) violemment ^(fr), hardiment ^(fr)

Adviebe

roed (nén candjåve)

1. rade, raddimint.
   • MELIYE. – […] Mi matante dit ki s’ plaece est foirt boune. Et si oniesse, dai ! Des si belès manires !
     DONé. – Ta, ta, ta ! Ké lavasse ! Nén si roed, båshele, nén si roed ! — Henri Simon, « Sètche, i bètche » 1889, (eplaidaedje da Jean Haust e 1936), p.37 (fråze rifondowe).
   • Li vint ki pidjole et birlance
     Metant les fleurs a cabalance,
     Va bén trop roed !— Martin Lejeune, “ Œuvres lyriques du poète Martin Lejeune” p.138, « E corti » (fråze rifondowe).
   • N’ alez nén si roed, dit-st ele li banse, li pôve viye djin ki m’ trinne forboute et esse dins les transes. — Henri Pétrez (fråze rifondowe).
2. foitmint.
   • Neni, nosse dame : li mwaisse a cwité foirt timpe et dj’ n’ a polou fini tot seu ; portant dj’ a-st ovré roed, savoz ! — Henri Simon, « Li bleû-bîhe » 1886, (eplaidaedje da Jean Haust e 1936), p.12 (fråze rifondowe).
   • Mins ene taeyante pire finda l’ espåce,
     Et vna fåyler l’ front do moudreu !
     Li gougne aveut peté si roed,
     Ki l’ ome, a l’ efant, dmanda gråce. — Joseph Vrindts, ”Vîx Lîge” (1901), p.80, “Li p’tit Pît’lé” (fråze rifondowe).
3. pår.
   • Il est roed sot.

Ratourneures

1. beazet roed, bonzè roed : raddimint et avou del foice.
   • I vneut beazet roed. — Louis Remacle.
   • Li trûte hosse li cawe bonzè roed dizo l’ corant ki lyi cateye li schrene. — Joseph Houziaux.
2. ossu roed k’ on tchår-ås-bancs : nén foirt rade.
   • Li trin avance dabôrd ossu roed ki l’ tchår-ås-bancs d’ Inguezêye. — Les crwès dins les bruwères (fråze rifondowe).
3. toumer roed bleu sot d’ ene sakî : toumer fén amoreus d’ lu (leye).
   • Portant dj' so reû-bleû du m' vwèzène Marèye— Camille Gaspard.

Mots d’ aplacaedje

• roetabale

Mots vijhéns

(pår)

• tot
• mo
• totafwait

Ortografeyes

Divant 1900 :

• reû : E203 ^(lére)
• reu : E177, E184

Après 1900, foû rfondou (Feller, Feller ricandjî, nén Feller) :

• reû : E1
• riwè : C9
• rwè : C9

Li mot n’ est nén dins : R13

Ratournaedjes

rade

• Francès : vite ^(fr), rapidement ^(fr)

pår

• Francès : complètement ^(fr)

beazet roed, bonzè roed

• Francès : violemment ^(fr), vivement ^(fr), âprement ^(fr)

toumer roed bleu sot d’ ene sakî

• Francès : avoir le coup de foudre ^(fr)