背景故仔

背景故仔（粵音：bui3 ging2 gu2 zai2；英文：backstory）喺敘事學同創意寫作上係指一類嘅事件，呢啲事件對個故仔嚟講重要，會對情節同角色嘅行為產生具體影響，但發生喺主要情節之前。正路嚟講，所有有返咁上下重要嘅角色都會有背景故仔，但可能得一兩個角色嘅背景故仔會零舍受注目。

基本概念

睇埋：情節

例子：

• 主角係一個孤兒，佢阿爸阿媽嘅死係一個謎，而故仔後期發現（情節入面發生嘅事），原來個故仔嘅大奸角為咗得到主角阿爸阿媽嘅某樣嘢而殺死佢哋（一件影響角色動機嘅往事），知道咗呢點之後，主角更加想打低個奸角（角色動機起變化）。
• 《壞蛋獎門人》：主角阿古係一個大賊，一心淨係想專注於佢嘅事業，而且性格有少少冷漠無情；但因緣際會領養咗三個孤兒之後，佢開始軟化（情節入面發生嘅事）；及後佢回想起自己嘅童年，原來佢細個嗰陣成日都俾佢阿媽睇唔起，所以先搞到佢咁執著要成功（一件影響角色動機嘅往事）。
• 《五星級大鼠》：主角去到一間五星級大餐廳嗰度要求學廚，正當間餐廳嘅大廚想𢴒佢走之際，主角將一封信交俾大廚，封信係佢啱啱過咗身嘅阿媽寫嘅（情節入面發生嘅事）：原來主角阿媽臨過身之前話俾佢知，主角阿爸查實係嗰間五星級餐廳嘅創辦人，所以佢想靠噉要求間餐廳俾份工主角做（一件引導主角到達主要故仔發生點嘅往事）。

寫作手法

睇埋：閃回

作家有好多方法可以喺主情節途中向讀者觀眾傳達角色嘅背景故仔，例：作者可以要主角有一個閃回，即係故仔中途突然改變鏡頭，變成入去主角腦睇主角回想起嘅一段記憶；又可以要啲角色喺對話中途傾到個背景故仔嘅事（不過呢點要做得好有技巧，望落先唔會生硬）；又可以要主角搵到其中一個重要角色嘅日記或者信等嘅文件，並且由文件當中知道背景故仔... 等等。有陣時，一個寫得好嘅背景故仔最後仲可以由作者做擴充，變成一個獨立嘅作品－前傳，例如星戰系列有多套戲都係噉。

睇埋

• 前傳
• 閃回事件
• 角色發展

文獻

• Herman, D., Jahn, M., & Ryan, M. L. (2010). Routledge encyclopedia of narrative theory. Routledge.

拎

• （英文） 背景故事，電視橋段網講背景故仔嘅概念。