Alexandre Gustave Eiffel
Alexandre Gustave Eiffel (15 e Diciembri e 1832, Dijon - 27 e Diciembri e 1923, París) hue un engenieru francés, especialista en estruturas metálicas. El apelliu Eiffel hue adotau pol unu los sus antepasaus a prencipius del sigru XVIII, tomau el su lugal de nacéncia: Marmagen, ena rehión de Eifel, ya qu'en francés nu era posibri prenuncial el su verdaeru nombri: Alessandre Gustaf Bönickhausen.
Nu se le premitió ingresal ena École Polytechnique francesa, polo que acabihó graduándusi cumu engenieru químicu en 1855. Pocu aluspués esminció a labutal nuna impresa d'equipus pa ferrucarrilis.
En 1867 hunda la consurtora i costrutora Eiffel et Cie. que consiguió un gran prestihiu entrinacional nel usu el hierru, costruyendu una tupa emportantis estruturas (puentis, gruas, estacionis...).
Grácias a la ayua el engenieru belga Téophile Seyrig, s'ahudicó una subasta entrinacional pa diseñal i costruil un viadutu e 160 metrus de lús sobri riu Dueru, entri Oportu i Vila Nova de Gaia, Purtugal. La su propuesta gastaba el "métu e huerças", una ténica e diseñal estruturas nueva en aquella epoca, creá pol Maxwell en 1846. La Puenti Maria Pia está costituia pol un dobri arcu que sostieni la via única e ferrucarril pol meyu e pilaris que rehuerçan tola puenti. La costrución hue bastanti lihera i estuvu acabihá en menus de dos añus (5 d'Eneru e 1876 - 4 e Noviembri e 1877). Hue inaugurá pol rei Luis I i la reina María Pía. La puenti se usó hata 1991 (114 añus) i se sustituyó pola nueva puenti e San Juan. Un diseñu el engenieru Edgar Cardoso.[1]
Tamién costruyó el viadutu e Garabit en Truyère, que tuvu el arcu e mayol lús la su epoca (165 m).
La su costrución mas famosa es la Torri Eiffel. Costruia entri los añus 1887 i 1889 con motivu la Esposición Universal de 1889 en París, Fráncia. Nu es tan conociu qu'él diseñó la estrutura enterna la Estatua la Libertá e Nueva York. Contrahu esperiéncia ena costrución diseñandu puentis de hierru.
Gustave Eiffel tamién diseñó La Ruche en París, que se convertiria, al igual que la Torre Eiffel, nun puntu e referéncia e la ciá. Una estrutura circulal de tres pisus que paci una cormena. Se creó cumu una costrución temporal pala Gran Esposición de 1900.
La reputación d'Eiffel se vió bastanti estruciá cuandu se vió engüertu en escándalus financierus alreol a Fernando de Lesseps.
Enos sus úrtimus añus prencipió a estuyal aerudinámica. Eiffel espenó el 27 e Diciembri e 1923, a los 91 añus, ena su mansión de la Rue Rabelais de París i hue entierrau nel cementériu e Levallois-Perret, ena mesma localiá.
Obras
[Edital | Editá'l códigu]- Torri Eiffel, París, Fráncia
- Puenti e Bir-Hakeim, París, Fráncia
- Estátua la Libertá (solu la estrutura), Nueva York, Estaus Uñius
- Naves del Barrancu, Sevilla, España
- Estación ferruviária el Oesti, Budapest, Hungria
- Estación Central de Santiago, Santiago, Chili
- Puenti Bolivar i Estación de Trenis, Arequipa, Perú
- Teatru Fenix, Arequipa, Perú
- Mercau e San Camilo, Arequipa, Perú
- Catedral San Marcos d'Arica, Chili
- Aduana d'Arica, Chili (ogañu Casa la curtura)
- Catedral de Tacna, Perú
- Casa e Hierru, Iquitos, Perú
- Puenti ferruviária Banco Arenas, Constitución, Chili
- Elésia e Guayacán, Coquimbo, Chili
- Hinásiu Liceo de Aplicación, Santiago, Chili
- Coléhiu San Benito, Santiago, Chili
Referéncias
[Edital | Editá'l códigu]- ↑ (en purtugués) Puente María Pía. Revisau el 07-01-2007
Atijus
[Edital | Editá'l códigu]
En Commons ai conteníu multimedia sobre Alexandre Gustave Eiffel.- Atihu en Structurae al tentu Alexandre Gustave Eiffel