Elizabeth Rosemond Taylor, coñecida como Liz Taylor, nada o 27 de febreiro de 1932 e finada o 23 de marzo de 2011, foi unha actriz norteamericana nada en Inglaterra. Desenvolveu nos Estados Unidos unha carreira artística que se estendeu por máis de sesenta anos, na que adquiriu popularidade principalmente como actriz en películas de Hollywood.[1]
Foi unha icona do cinema clásico grazas á súa beleza e mais as súas habilidades para a interpretación, así como tamén por mor do seu estilo de vida de Hollywood, incluíndo oito matrimonios, dous deles co tamén actor Richard Burton, e extravagancias. Taylor está considerada unha das grandes actrices dos anos dourados de Hollywood. O American Film Institute designou a Taylor como a sétima entre as estrelas femininas máis grandes de todos os tempos.
