Ottawa
| Ottawa | ||
| ||
| Kelk imaji pri Ottawa. | ||
|
| |
| Standardo | Blazono | |
| Lando: |  Kanada
| |
Informo:
| ||
| Latitudo: | 45°25' N | |
| Longitudo: | 75°42' W | |
| Altitudo: | 70 m | |
| Surfaco: | 2778,64 km² | |
| Habitanti: | 883 391 (2011) | |
| Horala zono: | UTC-4 | |
Mapo:
| ||
_-_CAN_-_UNOCHA.svg)
| ||
Ottawa esas la chef-urbo e la 4ma maxim populoza urbo di Kanada. Segun la demografiala kontado di 2011, ol havis 883 391 habitanti[1]. Lua tota surfaco esas 2778,64 km².
Lua nomo Ottawa devenas de Algonquiana indijena Usana vorto adawe, quo probable signifikas "granda rivero".
Historio
[redaktar | redaktar fonto]L'urbo kreskis dum la yari 1820a apud la kontoro dil Britaniana Rejala Injeniori. Ottawa divenis chef-urbo dum la meza 19ma yarcento sub nomo Bytown.
Quar urbi rivalesis pri la honoro divenar chef-urbo di Kanada: Québec, Montreal, Kingston e Toronto. Singla klarigis ke irga tri ek li forte opozus la selekto dil quaresma – do, en 1858, rejino Viktoria pregesis arbitriar. El kompromisis per selektar kinesma - Ottawa.
Toronto evis plu kam 100 yari; Québec, Montreal e Kingston fondesis dum la 17ma yarcento. Ottawa evis apene tri yardeki kande ol selektesis kom chef-urbo.
En 1900, granda incendio destruktis 40% ek la vicina urbo Hull, en Kebekia, e cirkume 20% de Ottawa. Ye la 1ma di junio 1912, la ferovoyala kompanio Grand Trunk Railway inauguris la hotelo Château Laurier e la vicina staciono Central Station.
Ye la 3ma di februaro 1916, l'edifico di la nacionala parlamento, konstruktita dum la yari 1860a, esis destruktata pro fairo. Rumori sugestis ke, eventante dum la mondo-milito, lo esis pre-meditita incendio; tamen la supozajo esas ke la kauzo esis neglijeme abandonita sigaro. Laboro balde komencis por nova edifico, qua similesis la antea strukturo, e la parlamento unesmafoye kunvenis en la nova strukuro en 1920.
L'anciena imajo di Ottawa kom industriala urbo modifikesis dum la yari 1950a. Lora chefministro William Lyon Mackenzie King engajis Franc arkitekto Jacques Greber por projetar la developo di la chef-urbo di la lando, e facar ol estetikale agreabla. Inter altri, l'idei esis krear vasta verda areo protektita (Greenbelt), konstruktar l'expresa choseo Sir John A. Macdonald e la choseo 417 (Queensway), descentraligar publika oficeyi e rilokizo di kelka industrii. L'enplantaco dil projeto eventis dum la yari 1960a e 1970a.
De la yari 1960a til la yari 1980a, la quanto di nova konstrukturi en la urbo kreskis. Dum la sequanta du yardeki, l'industrio di alta teknologio expansesis, ed Ottawa surnomizesis "Norda Siliko-valo". L'inquesto-centro di la kompanio Bell (Bell Northern Research, pose nomizita Nortel) havis mili di employinti e sideyo en la urbo. En 1991, l'urbo respondis anciena demando dal populo Algonquin, ed establisis pakto segun quo le Algonquin abdikis pri demandar proprieto-tituli en la urbo, kambie la granto di altra yuri.
Geografio
[redaktar | redaktar fonto]
Jacanta an la suda rivo dil rivero Ottawa, e proxim la rivero Rideau, la reliefo di Ottawa esas partale plana kun kelka kolini. Lua minima altitudo esas 44 metri adsur la maro, an la rivo dil rivero Ottawa. La maxim alta punto jacas 166 metri super la marala nivelo.
La klimato dil urbo esas humida kontinentala (Dfb segun la klimatala klasifikuro da Köppen), kun quar distinta sezoni. La mezavalora temperaturo en julio (somero) esas 26,6°C, kontre ke la mezavalora temperaturo en januaro (vintro) esas -14,4°C. Omnayare, dum cirkume 16 dii, la temperaturi falas infre -20°C.
La mezavalora yarala pluvo-quanto esas 755,5 mm. La maxim pluvoza epoko iras de aprilo til novembro. Tamen, ne existas sezono sen precipito en la urbo, nam de la duimo di novembro til la komenco di aprilo nivas en la urbo, plu intense de decembro til marto.
Gatineau
[redaktar | redaktar fonto]An la norda latero dil rivero, en la provinco Kebekia, jacas urbo Gatineau. La du urbi formacas metropolala regiono.
Referi
[redaktar | redaktar fonto]- ↑ Tableau 5 - Municipalités (subdivisions de recensement) les plus populeuses, par province et territoire, 2011 - URL vidita ye 1ma di junio 2018. Idiomo: Franca.