Alberta

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De ligking van Alberta in Canada.

Alberta is 'n pervinsje in 't wèste van Canada mit 'n oppervlakdje van 661.190 km². De houfstad is Edmonton; de grótste stad en 't ikkenomisch centrum is aevel Calgary. Anger groeate stej inne pervinsje zeen Banff, Camrose, Fort McMurray, Grande Prairie, Lethbridge, Lloydminster, Medicine Hat en Red Deer.

Albert haet mieër es 4 miljoen inwoonders (2016), wovan de meisten inne stej wone. Zón twieë perzent vanne bevölking is Franskallendj; 70.000 luuj behuuere toet indianestamme, veural de Cree enne Siksika. 't Haet groeate Sjinese en Oeas-Aziatische gemeinsjappe inne pervinsje.

't Naordelik deil van Alberta is väöl kajer es 't zujelik deil; in 't zuje waere de zomers gekinmirk door druuegdje en bao weusdje-echtige waerstoestenj mit hoeag temperature. 't Wèste vanne pervinsje wuuert door berg besjermp; de werme windj - de chinooks - zörg veur 'n hieël zaach klimaat, dewiel de graasvlakdjes in 't oeaste e continentaal klimaat höbbe mit uterste van -35°C inne wintjer en +35°C inne zomer. De centraal en zujelike gebiede make deil oet vanne Naord-Amerikaanse tornadozone.

De pervinsje Alberta is de grótste producent van roewen aolje, netuurlik aerdgaas en gaasperdukten in Canada. Twieë vanne grótste petrosjemische febriekke van Naord-Amerika ligken in 't midde van Alberta.