Singapore

Singapore består av éi hovudøy og 62 mindre øyar. Det er to bruer til fastlandet i nord. Landet er litt større enn Oslo i storleik.

Mesteparten av landet er flatt. Det høgaste punktet ligg 163 meter over havet. Dei få områda med skog ligg i naturreservat.

Singapore botaniske hage er den einaste tropiske hagen i verda som står på UNESCOs verdsarvliste. Det lever fleire aper, flaggermus, slangar og meir enn 130 fugleartar i landet.

Mesteparten av straumen og energien kjem frå fossilt brennstoff, som naturgass.

Singapore har tropisk klima med varmt vêr hele året. I periodar regnar det mykje i området.

Kinesarar er den største folkegruppa i landet. Det bur også mange malayar og indarar i Singapore. Dei fleste menneska bur i hovudstaden Singapore.

Heile befolkninga bur i byar. Engelsk, kinesisk, malayisk og tamil er offisielle språk i landet. Buddhisme er den største religionen. Det er også mange kristne og muslimar i landet.

Grunnskulen er gratis, og alle barn må gå på skule frå dei er 6 til 17 år. Det blir undervist mest på engelsk i skulen. Det finst både offentlege og private universitet, i tillegg til mange høgskular, i landet.

Fotball er den mest populære sporten blant barn og ungdom.

Singapore er ein republikk med president som statsoverhovud. Det er statsministeren og regjeringa som styrer landet. Det same politiske partiet i landet har hatt makta sidan 1959.

Myndigheitene har blitt kritiserte for at både media og internett blir overvaka og kontrollerte.

Mange menneske i Singapore arbeider med handel, økonomi og turisme. Landet har ein moderne og variert industri, og tener pengar på å mellom anna selje elektronikk og medisinar til andre land.

Singapore er medlem av mellom anna FN, Verdsbanken og Samveldet av nasjonar.

Allereie frå 200-talet var Singapore eit senter for handel mellom fleire store rike i området.

I 1819 blei Singapore eit viktig senter for handel for Storbritannia. Frå 1826 var Singapore ein britisk koloni. Utover på 1800-talet blei Singapore den viktigaste handelsbyen i Søraust-Asia.

Under andre verdskrigen blei øya okkupert av Japan. I 1959 fekk øya meir sjølvstyre, før Singapore blei ein sjølvstendig republikk i 1965.

I 2017 ble Halimah Yacob vald som den første kvinnelege presidenten i landet. I dag er Singapore eit av dei landa med høgast inntekt i verda.

• Asia
• kolonialisme
• Samveldet av nasjonar
• buddhisme