Dei grøne buskane bak er einer. Dei er døme på buskar med berre éi stamme. Foran er det små buskar med røsslyng. Slike små buskar vert kalla dvergbuskar.
Rynkerosar blir ofte store buskar som ikkje gjev plass til andre artar. Dette gjeld særleg langs kysten og ved strender. Rynkerose er ein framand art i norsk natur. Det betyr at det er forbode å plante ut desse buskane.
Ein busk er ei plante som veks med fleire harde stenglar opp av jorda. Stenglane er harde, som stenglane hos i tre, og blir kalla vedaktige. Når stenglane til ei plante er vedaktige, vert dei kalla for stammar.
Hos buskar er det ofte ingen hovudstamme, sånn som på tre. Alle stammene kan vera omtrent like tjukke og lange.
Buskar lev i meir enn eitt år. Difor vert dei kalla fleirårige. Nokre buskar er høge, medan andre kan vera veldig små. Røsslyng er ein veldig liten busk. Slike små buskar heiter dvergbuskar. Nokre buskar har forveda stamme nedst, men grøn stengel øvst. Desse vert kalla halvbuskar. Bringebær er eit eksempel på ein halvbusk.
Buskar kan sjå ganske ulike ut. Nokre buskar har nåler, slik som einer. Dei kan felle bladene om hausten, slik som blåbær, eller halde på dei gjennom vinteren, som hos tyttebær.
Buskar skil seg frå tre, ved at buskane har meir enn ein stamme. Dessutan er buskane ofte lågare enn tre.
Det kan høyrast enkelt ut å sjå om noko er ein busk eller eit tre utifrå om det har ein eller fleire stammar og kor høg planta er. Men det er ikkje alltid så lett. Nokre tre kan ha fleire stammar, for eksempel hassel. Og nokre buskar kan ha berre ei stamme, for eksempel einer.
Nokre buskar har fine blomar, og vert dyrka i hagar, slik som rhododendron. Andre buskar vert dyrka for fruktene dei set. Rips, solbær og bringebær er døme på slike buskar.
