Olav Skard

Skard voks opp i Gausdal og Levanger som den nest eldste i ein stor barneflokk med halvsysken. Han tok eksamen innan hagebruk ved Norges landbrukshøgskole (NLH) i 1904. Før det hadde han lærlingpraksis og hadde gått hagebruksskulen på Hylla i Nord-Trøndelag. Vinteren 1906–1907 var han elev ved Askov folkehøiskole i Danmark. Deretter var han knytt til ulike hagebruksskular, som lærar ved Berby i Idd i 1904–1907, styrar på Revo i Sande i Vestfold i 1908–1910 og Reistad i Lier i 1911–1918. I tillegg var han lærar ved småbrukslærarskulen på Sem i Asker i 1913–1915.

Skard vart etter kvart ein respektert fagmann innan frukt- og bærdyrking. Utan å ha spesielle vitskaplege kvalifikasjonar vart han i 1934 professor i fruktdyrking ved NLH, ei stilling han hadde til han gjekk av med pensjon i 1951. Han underviste fram til 1956.

Skard var sekretær i Selskapet Havedyrkningens Venner i 1919–1934. Dette var ei leiarstilling som omfatta administrative oppgåver, men òg eit stort fagfelt. Han var redaktør for publikasjonane til selskapet, og han skreiv sjølv mykje, både artiklar og bøker. Den populærvitskaplege Havebok for barn og ungdom og boka Frukthagen kom i ei rekkje utgåver. Seinare gav han ut Norsk fruktdyrking og to bind Norsk pomologi saman med forsøksleiarane Per Stedje og Erling Kvaale.

Skard hadde mange tillitsverv, mellom anna som formann i Lier hagebruksforening i 1913–1921, og i 1921 vart han vald inn i styret for Selskapet Havedyrkningens Venner. I sekretærtida der var han dessutan formann i Norsk skolehageforbund, Norsk kolonihageforbund og Gartnernes og hagebrukernes salgslag.

I 1935 kom han med i styret for Det norske hageselskap og var formann der i 1938–1954. I Den norske landbruksveka var han medlem av representantskapet i 1939–1954 og formann i styret i 1945–1950. Skard var æresmedlem av mellom anna Det norske hageselskap og Sveriges pomologiska förening, og han blei utnemnd til ridder av 1. klasse av St. Olavs Orden i 1948.

Skard hadde også verv i mellom anna skulestyre, menigheitsråd og næringsnemnd.

• Havebok for barn og ungdom, 1914 (10. utg. 1978)
• Hagebruk for heim og skule. II. Frukthagen, 1934 (4. utg. 1949)
• Norsk pomologi. I. Epler (saman med P. Stedje), 1939 (3. opplag 1947)
• Norsk fruktdyrking. Rettleiing på grunnlag av innen- og utenlandske forsøk, undersøkelser og røynsle, 1941 (3. utg. 1946)
• Høsting, sortering og pakking av frukt og bær, 1949 (5. utg. 1961)
• Norsk pomologi. II. Pærer (sm.m. E. Kvaale), 1958
• Det norske hageselskap (Havedyrkningens Venner) 1884–1959, 1959
• Hagebruket i Lier gjennom tidene, red. av B. Foss, (posthumt) 1984

• hagebruk
• jordbruk i Noreg
• Det norske hageselskap

• O. Klokk: biografi i Norsk biografisk leksikon 1, bd. 13, 1958
• Hvem er hvem 1964
• E. Strømme m.fl. (red.): Hagebruk og hagekunst i 100 år, Ås 1987
• O. Aspesæter: Det norske hageselskaps historie 1884–1984, 1984