Bukowski blei fødd i Tyskland som Heinrich Karl Bukowski, men familien flytta til USA i 1923 og slo seg ned i Baltimore. I 1930 flytta dei til Los Angeles.
Sjølv om han gjennomførte nokre reiser og oppheldt seg lange periodar rundt omkring i USA, var det Los Angeles som sette sitt preg på han, på godt og endå meir på vondt. Han voks opp med ein valdeleg far, han snakka engelsk med sterk tysk aksent og blei gjort til latter i nabolaget. Men han fullførte skulen og studerte eit par år før andre verdskrigen.
Tidleg oppdaga han at alkohol kunne vera til stor hjelp når livet gjekk han imot, og alkoholmisbruket følgde han heile livet. I periodar arbeidde han som postbod i Los Angeles, først i ein treårsperiode og deretter nesten ti år før han blei forfattar på heiltid, 49 år gammal. Eit kortvarig ekteskap gjekk tidleg over styr og blei følgt av ei rekkje kortare og lengre kjærleiksforhold, før han møtte Linda Lee Beighle i 1976 og seinare gifta seg med henne. Alle forholda utgjorde viktig materiale til tallause dikt og ei rekkje noveller. Han er også sjølv utvilsamt til stades i romanane sine som alter egoet Henry Chinaski.
Bukowski blei tidleg sett på som ein undergrunnsforfattar. Han har blitt kalla «laureate of American lowlife» og plassert blant dei «skitenrealistiske» forfattarane, noko som også kjem fram i tittelen på avisspalta «Notes of a Dirty Old Man», som han skreiv i eit par år. Han publiserte vidt og breitt, gjerne i ubetydelege og ukjende magasin og tidsskrift som fort blei lagde ned, og produksjonen var enorm. Først då han fekk eit tilbod frå forlaget Black Sparrow Press i 1969, slutta han i postverket og blei forfattar på heiltid. Den første romanen hans, Post Office, var ferdigskriven kort tid etterpå og kom ut i 1971.
Bukowski døydde av leukemi i 1994, 73 år gammal. På gravsteinen står det «Don't Try», henta frå eit av dikta hans. Med det meinte han at ein forfattar berre skal venta og venta til noko skjer. Diktaren må ikkje prøva å oppnå rikdom, ry eller udøyelegheit.
Kommentarar (2)
skreiv Bjørnulf Aasen
Det oppgis feil tittel på den norske utgivelsen fra 1980, både i selve artikkelen og i litteraturlisten. Det står "Dagene fyker av sted som ville hester over alle hauger". Riktig tittel er "Dagene styrter avsted som ville hester over alle hauger".
For øvrig virker det litt pussig at han "flytta med foreldra til USA i 1923 og slo seg ned i Baltimore." En treåring er neppe i stand til å slå seg ned et sted.
svarte Anne Eilertsen
Hei, og takk for rettelsen! Det er rettet opp i artikkelen nå.
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.