Nikolaj Judenitsj

Nikolaj Judenitsj var ein russisk general. Han var ein av leiarane for dei kvite (anti-revolusjonære) styrkane under den russiske borgarkrigen, i kjølvatnet av den russiske revolusjonen.

Judenitsj var ein suksessfull offiser på russisk side under den første verdskrigen, langs fronten i sør mot Det osmanske imperiet. Han var ingen tilhengar av det nye styret som blei sett inn etter februarrevolusjonen, og i august 1917 støtta han kuppforsøket til Lavr Kornilov.

I åra 1917-1919 levde Judenitsj i skjul, mellom anna i Finland. Med britisk støtte tok Judenitsj her ei aktiv rolle i å organisere militær motstand mot styret til bolsjevikane. Sommaren 1919 kom han til Estland, der den antibolsjevikiske Nordvestarméen no hadde base. I oktober same år gjorde denne armeen under leiing av Judenitsj eit forsøk på å erobre Petrograd, men dei kvite styrkane blei slått tilbake av Den raude armeen like utanfor byen. I januar 1920 blei Nordvestarmeen til Judenitsj oppløyst på territoriet til det nye sjølvstendige Estland, som no inngjekk ein fredsavtale med bolsjevikane. Judenitsj emigrerte vestover og slo seg til slutt ned i Frankrike.