Olden

Frå Olden inst i fjorden strekk Oldedalen seg 20 kilometer sørover inn mellom armane til Jostedalsbreen. Frå eit par kilometer innanfor fjorden er dalbotnen oppfylt av Oldevatnet. Det går bilveg langs vatnet frå Olden til Briksdalen. Frå sørenden av vatnet når dalen inn til Briksdalsbreen og Melkevollsbreen.

Oldendalføret er ein U-dal med 1500–1800 meter høge fjell på kvar side. Auflemfjellet ligg på austsida av Oldebukta og Skarsteinfjellet på vestsida. Dalføret går rett sørover til Oldeskaret som dannar fjellovergang til Stardalen i Jølster. Det er stor skredfare i heile dalen.

Gjennom dalføret renn Oldenelva. Elva har status som nasjonalt laksevassdrag og er dermed verna mot forureining og utbygging.

Olden har stor tilstrøyming av turistar; dei fleste frå cruiseskip. I Olden får turistane tilbod om turar til Briksdalen, Kjenndalen, Nasjonalparksenteret og å køyre panoramavegen i Nordfjord. Tidlegare gjekk det hesteskyss til Briksdalsbreen, men på grunn av uhell med hestane er han erstatta med skyss i open bil («Trollbilane»).

Klimaet i dalføret er gunstig for jordbruk. Det blir dyrka korn og blir halde geit.

Namnet kjem av norrønt Aldi. Dette er truleg eit fjordnamn som kan ha samanheng med alda, 'bølgje', det vil seie 'den bølgjefylte'; eller av rota alð-, 'trau' eller 'innsøkk'. Dette peikar i så fall på den rettlina forma til Oldedalen.

• Stryn
• Nordfjord
• Oldevatnet