Zhu Jiang

Zhu Jiang er Sør-Kinas største vassdrag. Zhu Jiang ligg sør for Chang Jiang, og er etter denne Kinas nest største vassdrag målt etter vassføring.

Zhu Jiang-vassdraget består av dei tre elvane:

• Xi Jiang (vestelva)
• Bei Jiang (nordelva)
• Dong Jiang (austelva)

Desse renn, i rekkefylgje, vestfrå, nordfrå og austfrå, og møtest i eit stort deltaområde ved Guangzhou i provinsen Guangdong.

Det samla nedbørområdet er på 453 000 kvadratkilometer, der Xi Jiang-elva åleine omfattar 78 prosent. Xi Jiang spring ut i Maxiongfjella i provinsen Yunnan, og renn 2197 kilometer gjennom provinsane Guangxi og Guangdong. Det nedre laupet er rundt 1500 meter breitt.

Hovudmunninga er Modaomen vest for Macao, men fleire avlaup straumar austover og går saman med elvane Bei Jiang og Dong Jiang. Bei Jiang spring ut i provinsen Jiangxi og renn 468 kilometer før ho møter avlaup frå Xi Jiang og munnar ut ved Hongqili og Jiaomen. Dong Jiang-elva, som også spring ut i Jiangxi, er 523 kilometer lang. Det nedre laupet deler seg opp i mange avlaup, men hovedmunninga er Humen ('tigerporten'). Den totale vassføringa er på 340 milliardar kubikkmeter årleg.

Zhu Jiang-vassdraget dannar eit stort flatt deltaområde, ofte kalla Zhujiangdeltaet (eller Perleelvdeltaet), på 11 000 kvadratkilometer mellom Guangzhou, Macao og Hongkong. Deltaområdet er det tettast befolka området i Guangdong, og det omfattar det første av Kinas tre leiande økonomiske vekstsenter.